Read sango Abia (Psaumes) 103 Bible Online

Abia (Psaumes) 103 - sango bible

Abia (Psaumes) 103

¹Bia ti David. Mbi ye ti mu singila na *KOTA GBIA! Na be ti mbi kue, mbi ye ti mu singila na Nzapa so ayeke nde si ayeke nzoni kue.

²Biani, mbi ye ti mu singila na KOTA GBIA! Anzoni ye so lo sara na mbi, mbi ye ti girisa mbeni oko pepe.

³Lo laa lo zi asioni so kue ayeke na li ti mbi, lo laa lo kai akobela ti mbi kue.

⁴Lo laa lo zi mbi na ya ti kuâ, lo ye mbi mingi si lo sara nzoni be na mbi ahon ndoni.

⁵Lo sara si na lango ti fini ti mbi kue, anzoni ye asi singo na mbi; lo sara si mbi kiri mbi wara ngangu tongana ti maseka si mbi duti na ngangu tongana *ngoalo.

⁶KOTA GBIA ayeke fâ ngbanga mbirimbiri, azo so amba ti ala asara ngangu na ala, lo yeke fâ ngbanga ti ala na legeni.

⁷Aye so lo leke na be ti lo ti sara, lo fa ni na Moïse; akota ye so lo sara, lo fa ni na azo ti Israel.

⁸KOTA GBIA ayeke baa mawa ti zo, lo yeke sara nzoni be na zo; lo yeke sara ngonzo hio hio pepe, me nzoni be ti lo asi singo.

⁹Lo yeke bi tënë na li ti zo lakue pepe, lo yeke bata tënë na be ti lo na tere ti zo biani biani pepe.

¹⁰Lo sara ye na e alingbi na siokpari ti e pepe, lo futa e alingbi na asioni ti e pepe.

¹¹Tongana ti so le ti nduzu ayo mingi na sese, nzoni be ti lo ndali ti azo so akpe mbeto ti lo ayeke kota mingi legeoko tongaso.

¹²Tongana ti so To ayo na Do, lo yeke zi aye ti kirikiri ti e, lo zia ni yongoro legeoko tongaso.

¹³Tongana ti so babâ aye amolenge ti lo mingi, KOTA GBIA aye mingi azo so akpe mbeto ti lo legeoko tongaso.

¹⁴Biani, lo hinga ye so a sara e na ni, lo dabe ti lo so e yeke gi fuku ti sese.

¹⁵Fini ti zo ayeke tongana pere; zo ayeke tongana kongo ti ngonda so asigigi,

¹⁶tongana pupu aya na ndö ni, kongo ni agirisa biani biani, zo ahinga ndo so ayeke fade daa pepe.

¹⁷Me nzoni be ti KOTA GBIA angba ngbene ye kpu na kpu, lakue lakue ndali ti azo so akpe mbeto ti lo. Lo ngba ti sara ye ti mbirimbiri na amolenge ti amolenge ti ala,

¹⁸ala so asara ye alingbi na tënë ti *mbuki ti lo; ala so ayeke dabe ti ala ti sara ye alingbi na yanga so lo mu.

¹⁹KOTA GBIA azia mbata ti lo ti gbia na yayu; lo yeke le-gbia na ndö ti aye kue.

²⁰Ala, *a-ange ti lo, ala mu singila na KOTA GBIA! Ala so ayeke na ngangu si ala yeke sara ye na peko ti yanga ti lo, gi so lo zi yanga awe, ala yeke sara ye alingbi na ni.

²¹Ala aturugu ti lo kue, ala azo ti kua ti lo so ayeke sara ye so be ti lo aye, ala mu singila na KOTA GBIA!

²²Ala, aye so kue lo sara, ala so ayeke na ndo so kue lo yeke gbia daa, ala mu singila na KOTA GBIA! Mbi nga, mbi ye ti mu singila na KOTA GBIA!