Read sango Abia (Psaumes) 104 Bible Online

Abia (Psaumes) 104 - sango bible

Abia (Psaumes) 104

¹Mbi ye ti mu singila na *KOTA GBIA! *KOTA GBIA Nzapa ti mbi, mo yeke kota mingi! Mo yu gonda na nengo tongana bongo;

²vurungo ndo akanga tere ti mo tongana kota bongo; mo gbara ayayu tongana ti so zo ayeke gbara da ti bongo;

³mo zia ada ti mo na ndö ti ayayu ni. Mo sara si ambinda aga pusu ti mbarata ti mo; mo yeke tambula na ndö ti pupu.

⁴Mo sara si apupu aga awatokua ti mo si amenga ti wâ aga azo ti kua ti mo.

⁵Mo sara si sese aluti ngangu na ndö ti agere ti lo; sese ni ayeke yingi laoko pepe.

⁶Mo sara si kota ngu so ali mingi akanga ndö ti sese kue tongana ti so bongo akanga tere ti zo; angu aluti na ndö ti ahoto.

⁷Mo suku na angu ni si ala kpe ahon; gi so ala ma toto ti bekpa ti mo, ala kpe ahon.

⁸Ala ma na li ti ahoto, ala zu na apopo-hoto ngbii ala si na ndo so mo leke ndali ti ala.

⁹Mo leke mbeni maka so angu ni alingbi ti hon ni pepe; ala yeke kiri ti mu ndö ti sese kue pepe.

¹⁰Mo sara si ali ti ngu asigigi si aga ngu so ayeke sua na popo ti ahoto.

¹¹Anyama ti ngonda kue ayeke nyon ngu ni, alele ti ngonda ayeke nyon ni alingbi na ala.

¹²Andeke ti nduzu asara ada ti ala na tere ti ngu ni; ala duti na popo ti akugbe ti keke si ala yeke he bia.

¹³Na ndo ti duti ti mo kâ na nduzu, mo tokua ngu na ndö ti ahoto; mo sara si sese asi singo na anzoni ye ti mo.

¹⁴Mo sara si pere amai ndali ti anyama, akugbe ti kasa so zo ayeke fâ yaka ni amai, tongaso si zo awara kobe ti lo so asigigi na ya ti sese:

¹⁵vin asara si tere ti zo anzere, asara si le ti zo aza ahon mafuta so zo asara na le ti lo; kobe akiri amu ngangu na zo.

¹⁶Akeke ti KOTA GBIA na akeke ti sedre ti Liban so lo lu, awara ngu alingbi na ala.

¹⁷Andeke asara da ti ala na ya ni, kota ndeke awara ndo ti duti ti lo na ya ti keke ti sipre.

¹⁸Akota hoto ayeke ndali ti angasa ti ngonda, akota têne ayeke ndo ti hondengo tere ti aleli.

¹⁹KOTA GBIA asara nze ti fa alango ti amatanga, lâ ahinga ngbonga ti kuingo ti lo.

²⁰Mo sara vukongo ndo, so bi laa; na ndembe so laa anyama ti ngonda kue ayeke fono;

²¹akete bamara ayeke toto ti gi nyama ti gbu, ala yeke hunda kobe ti ala na Nzapa.

²²Na ndembe so lâ ayeke sigigi, ala yeke kiri ti lango na ya ti adu ti ala;

²³zo ayeke sigigi na da ti lo ti gue na kua ti lo, lo sara kua ngbii asi na lakui.

²⁴KOTA GBIA, aye so mo sara ayeke mingi! Mo sara aye ni kue na lege ti ndara ti mo; sese asi singo na aye so mo sara.

²⁵Baa kota ngu-ingo laa: le ni akono mingi, zo alingbi ti baa nda ni pepe. Akota nyama na akete nyama so zo alingbi ti diko wungo ti ala pepe ayeke fono na ya ni.

²⁶Amangboko ayeke gue, ayeke ga na ndö ti kota ngu-ingo ni; Leviatan ayeke daa, lo so mo sara lo ti sara ngia na lo.

²⁷Azo na anyama so kue azia be ti ala na ndö ti mo titene mo mu na ala kobe na ngoi so alingbi.

²⁸Tongana mo mu ni na ala, ala wara; tongana mo zi maboko ti mo, ala te ya ti ala asi.

²⁹Me tongana mo honde le ti mo na ala, mbeto agbu ala ahon ndoni; tongana mo zi pupu so ayeke na ya ti ala, lango ti ala ayeke hunzi, ala kiri na ya ti fuku ti sese.

³⁰Tongana mo tokua pupu ti mo na ya ti ala, a kiri a sara ala na fini ni; mo sara si aye so kue ayeke na ndö ti sese akiri aga fini ni.

³¹Ayeke nzoni gonda ti KOTA GBIA angba kpu na kpu! Ayeke nzoni be ti KOTA GBIA anzere ndali ti aye so lo sara!

³²Lo baa sese si sese ado; lo ndu ahoto, guru ti wâ asigigi daa.

³³Mbi ye ti he bia na KOTA GBIA na lango ti fini ti mbi kue; mbi ye ti pika mozoko ndali ti Nzapa ti mbi na ngoi so kue mbi de na fini.

³⁴Ayeke nzoni bia ti mbi anzere na lo; mbi ye ti duti na ngia ndali ti KOTA GBIA!

³⁵Ayeke nzoni azo ti siokpari ahon na ndö ti sese so biani biani, azo ti sioni akiri angba pepe! Biani, mbi ye ti mu singila na KOTA GBIA! Aleluya!