Read sango Abia (Psaumes) 105 Bible Online

Abia (Psaumes) 105 - sango bible

Abia (Psaumes) 105

¹Ala sepela *KOTA GBIA! Ala to mbela ti fa atene, lo yeke Nzapa! Ala sara si amara ahinga tënë ti akota ye so lo sara!

²Ala he bia na lo, ala pika mozoko na lo; ala tene tënë ti aye ti kpene so kue lo sara!

³Ala so ayeke gi KOTA GBIA, ala pika kate ndali ti iri ti lo so ayeke nde si ayeke nzoni kue, ala duti na ngia!

⁴Ala gi KOTA GBIA, ala gi ngangu ti lo, ala gi le ti lo lakue.

⁵Ala, *ahale ti Abraham, zo ti kua ti KOTA GBIA, ala, ahale ti Jacob, ala so KOTA GBIA asoro ala, ala dabe ti ala na aye ti kpene so lo sara; ala dabe ti ala na aye ti dongo be so lo sara, na atënë ti fango ngbanga so asigigi na yanga ti lo.

⁷Lo laa lo yeke KOTA GBIA Nzapa ti e, lo yeke fâ ngbanga na ndö ti sese kue.

⁸Lo dabe ti lo lakue na tënë ti *mbuki ti lo, tënë ti yanga ti lo so ague ngbii asi na ahale ti ala ti molongo saki oko;

⁹mbuki so lo na Abraham asara, lo deba yanga ti lo na Isaac ti bata ni laa.

¹⁰Lo sara si mbuki ni aga tongana mbela ndali ti Jacob, tongana mbuki so angba lakue lakue ndali ti Israel,

¹¹lo tene: “Mbi yeke mu na mo sese ti Kanaan titene aga ti mo na ti ahale ti mo.”

¹²Na ngoi ni so, ala wu mingi pepe, a lingbi ti diko wungo ti ala, ala yeke lani awande na sese ni.

¹³Ala yeke londo na ndo ti ambeni mara, ala yeke gue na ndo ti ambeni mara nde; ala yeke londo na mbeni kodro-gbia, ala yeke gue na mbage ti ambeni kodro-gbia.

¹⁴Me Nzapa azia zo oko ti sara pasi na ala pepe, lo pika agbia ndali ti ala.

¹⁵Lo tene: “Azo ti mbi so mbi soro ala so, ala ndu ala pepe, ala sara sioni na awayanga ti mbi pepe.”

¹⁶Lo sara si kota nzara aga na ya ti kodro ni, lo sara si kobe kue atia ala.

¹⁷Lo tokua mbeni zo na dawa ti ala kozoni: Joseph, lo so ala ka lo tongana ngbaa.

¹⁸A kanga gere ti lo na zingiri, a kanga ngbongboro wen na go ti lo

¹⁹ngbii tënë so Nzapa azia na yanga ti lo, tënë ni asi alingbi na ni; tongaso, tënë ti KOTA GBIA afa so tënë ayeke na li ti Joseph pepe.

²⁰Gbia ti kodro ni amu yanga titene a zi Joseph na ya ti zingiri; lo so lo sara komandema na ndö ti amara asara si a zi lo.

²¹Lo zia Joseph makonzi na ndö ti da ti lo, lo zia lo ti baa ndo na ndö ti aye ti lo kue,

²²ti gbu akota zo ti lo ti ngba na tere ti lo tongana ti so be ti lo aye, ti fa lege ti ndara na awamungo-wango ti lo.

²³Na pekoni, Israel ague na Ezipte, Jacob ague, aduti na kodro ti Kam.

²⁴Nzapa asara si azo ti lo awu mingi si ala ga ngangu ahon awato ti ala.

²⁵Lo sara si be ti azo ti Ezipte aga nde si ala ke azo ti lo; ala sara ye na azo ti kua ti lo na lege ti mayere.

²⁶Tongaso lo tokua Moïse, zo ti kua ti lo nga na Aaron so lo soro lo.

²⁷Na popo ti azo ti Ezipte, ala sara aye ti dongo be na iri ti Nzapa; na kodro ti Kam, ala sara aye ti kpene.

²⁸Nzapa atokua vukongo ndo si ndo avuko pitipiti na ya ti kodro ni; zo oko ake tënë ti lo pepe.

²⁹Lo sara si ngu aga mene si lo fâ asusu ti ya ti ngu ni.

³⁰Akongba amu ya ti kodro ti ala kue, ataa ya ti akubu ti yangbo ti gbia.

³¹Lo mu yanga si avuma so ayeke kpo zo kpongo na angungu amu ya ti kodro ti ala kue.

³²Titene lo tokua ngu-Nzapa na ala, lo tokua gi *apembe ti bekpa, wâ nga na menga ti wâ na ndö ti kodro ti ala.

³³Lo buba ayaka ti vinye na akeke ti fige ti ala, lo kungbi akeke so ayeke na sese ti ala.

³⁴Nzapa amu yanga si angadi aga nga na agbadola so zo alingbi ti diko wungo ti ala pepe.

³⁵Ala te apere kue ti kodro ni, ala te nga ale ti kobe ti sese ni.

³⁶Lo fâ akozo molenge kue ti azo ti kodro ni, akozo molenge so azo ni adu na ngoi so tere ti ala angba ngangu.

³⁷Lo sara si azo ti lo asigigi na ya ti kodro ni na gba ti wen ti nginza na lôro, zo oko na popo ti amara ti lo awoko na lege pepe.

³⁸Be ti azo ti Ezipte anzere mingi ndali ti hongo ti ala, ngbanga ti so mbeto ti ala asara azo ti Ezipte.

³⁹Nzapa agbara ngbongboro mbinda ti bata ala; na bi, wâ ayeke za titene ala baa na ndo.

⁴⁰Ala hunda lo, lo sara si adodoro aga; lo mu na ala kobe so alondo na yayu, ala te ya ti ala asi.

⁴¹Lo suru ya ti kota têne, ngu asigigi daa; ngu ni asua tongana *bale na ya ti benyama.

⁴²Lo dabe ti lo na zendo ti lo so ayeke nde si ayeke nzoni kue, zendo so lo mu na Abraham, zo ti kua ti lo.

⁴³Lo sara si azo ti lo asigigi na ngia na be ti ala, azo ti lo so lo soro ala, ala sigigi na dekongo na ngia.

⁴⁴Na pekoni, lo mu na ala sese ti amara nde si ye ti peko ti kua ti amara ni aga ti ala.

⁴⁵Lo sara tongaso titene ala bata ambela ti lo si ala sara ye alingbi na andia ti lo. Aleluya!