Read sango Abia (Psaumes) 106 Bible Online

Abia (Psaumes) 106 - sango bible

Abia (Psaumes) 106

¹Aleluya! Ala sepela *KOTA GBIA, ngbanga ti so lo yeke nzoni, nzoni be ti lo angba kpu na kpu!

²Zo wa laa alingbi ti tene tënë ti akota ye so KOTA GBIA asara zo wa? Zo wa laa alingbi ti fa atënë ti gonda ti lo kue, zo wa?

³Ti ala nzoni, azo so ayeke sara ye na lege ti ndia si ala yeke sara ye ti mbirimbiri na ngoi kue!

⁴KOTA GBIA, mo so mo yeke sara nzoni be na azo ti mo, dabe ti mo na mbi. Mo so mo yeke Wasongo-zo, baa lege ti mbi si.

⁵Tongaso si mbi lingbi ti baa ye ti nzoni so mo sara ndali ti azo so mo soro ala si mbi lingbi ti kangbi ngia so azo ti mo ayeke na ni si mbi lingbi ti pika kate ti mbi tongana ti azo so aga ye ti mo awe.

⁶Tongana ti so akotara ti e asara, e sara siokpari, e sara ye ti kirikiri, e sara sioni.

⁷Na ndembe so akotara ti e ayeke na Ezipte, mo sara aye ti kpene, me ala manda ye na lege ni oko pepe; ala girisa gba ti anzoni ye so mo sara, ala tomboka na tere ti mo na tere ti kota ngu-ingo ti Asosongo.

⁸Me KOTA GBIA asoo ala ti bata nengo ti lo, ti sara si azo ahinga ngangu ti lo.

⁹Lo suku na kota ngu-ingo ti Asosongo ni si ngu ni ahole; lo sara si akotara ti e ahon na ya ti ngu so ali mingi tongana ti so zo ayeke tambula na benyama.

¹⁰Lo soo ala na maboko ti azo so ake ala, lo zi ala na maboko ti awato.

¹¹Ngu amene azo so ake ala si mbeni oko angba pepe.

¹²Tongaso ala ma na be na tënë ti lo si ala he bia ti sepela lo.

¹³Me gi hio tongaso, ala girisa aye so lo sara, ye so lo leke na be ti lo ti sara, ala ku ni pepe.

¹⁴Na benyama, nzara ti aye so atia ala ahon ndö ti ala; na ndo so ngu ayeke daa pepe, ala tara be ti Nzapa.

¹⁵Lo mu na ala ye so ala hunda; na pekoni, lo bi sioni kobela na tere ti ala so ala yeke nge na ni gi na nduzu.

¹⁶Kâ na ya ti bâbâ, ala sara kota be na tere ti Moïse nga na Aaron, zo so a zia lo nde ndali ti KOTA GBIA.

¹⁷Sese asuru si amene Datan, akanga ndö ti azo ti bongbi ti Abiram.

¹⁸Wâ agbi bongbi ti azo ni, menga ti wâ agbi azo ti sioni so ahunzi ala.

¹⁹Na hoto ti Horeb, ala leke kete bagara, ala kuku ti voro yanda so ala sara na wen.

²⁰Ala zia Nzapa, lo so lo yeke gonda ti ala ti voro limo ti bagara so ayeke te gi pere.

²¹Ala girisa Nzapa, wasongo ala, lo so lo sara akota ye na Ezipte,

²²lo sara aye ti kpene na kodro ti Kam, nga na aye ti ziango mbeto na be ti zo na tere ti kota ngu-ingo ti Asosongo.

²³Nilaa Nzapa atene, fade lo yeke fâ ala ti hunzi ala, me Moïse, zo so lo soro lo, aluti na le ti Nzapa ti sara si ngonzo ti lo akai si lo fâ ala pepe.

²⁴Na pekoni, azo ni abaa pendere kodro ni tongana senge ye, ala ma na be na tënë ti Nzapa pepe.

²⁵Ala duti na gbe ti ada ti ala ti bongo si ala kasa ndo, ala ke ti ma yanga ti KOTA GBIA.

²⁶Tongaso lo yo maboko ti lo na nduzu, lo deba na ala, lo tene: ni yeke sara si ala kui na ya ti benyama,

²⁷ni yeke kangbi *ahale ti ala na ando nde nde, ni yeke sara si ala kui na popo ti amara nde.

²⁸Na hoto ti Peor, ala mu tere ti ala na nzapa *Baal, ala te anyama so a mu na *sandaga na anzapa so ayeke na fini pepe.

²⁹Na lege ti sarango ye ti ala, ala zia ngonzo na be ti KOTA GBIA, ndani laa sioni kobela ti bubango kodro ati na ndö ti ala.

³⁰Tongaso Pinas alondo, lo fâ ya ti tënë ni si sioni kobela ni ahunzi.

³¹Ye so lo sara so, KOTA GBIA adiko ni tongana ye ti mbirimbiri ngu na ngu, kpu na kpu.

³²Na tere ti ngu ti Meriba, akotara ti e azia ngonzo na be ti Nzapa, ala sara si ye ti sioni asi na Moïse;

³³ala sara si be ti lo aso mingi si lo tene tënë, lo gbu li ti lo pepe.

³⁴KOTA GBIA amu yanga na ala ti fâ azo ti Kanaan, me ala fâ azo ni pepe.

³⁵Ala bongbi na azo ti amara nde si ala manda lege ti sarango ye ti azo ni.

³⁶Ala voro anzapa ti azo ni si ayanda ni aga kuku ti gbungo ala.

³⁷Ala mu amolenge ti ala ti koli na ti wali na sandaga na asioni yingo.

³⁸Ala tuku mene ti azo so asara sioni pepe, so ti tene mene ti amolenge ti ala ti koli na ti wali; ala mu amolenge ni na sandaga na anzapa ti azo ti Kanaan si mene ni asara si kodro ni aga *sioni.

³⁹Na lege ti sarango ye tongaso, ala wani aga *sioni, sarango ye ti ala ni ayeke tongana sarango ye ti ndumba.

⁴⁰Ngonzo ti KOTA GBIA alondo tongana wâ na tere ti azo ti lo, azo so aga ye ti lo so, ala ga sioni mingi na le ti lo.

⁴¹Lo zia ala na maboko ti amara nde; azo ti kengo ala laa asara komandema na ndö ti ala.

⁴²Awato ti ala asara ngangu na ala si ala ga buba na gbe ti awato ti ala ni.

⁴³Fani mingi KOTA GBIA azi ala, me ala ngba lakue ti sara gi ngangu li, ala yeke linda lindango na ya ti sioni ti ala.

⁴⁴Me tongana KOTA GBIA ama toto ti ala si lo baa ye ti ngangu so asi na ala,

⁴⁵lo dabe ti lo na tënë ti mbuki ti lo na ala; ndali ti kota nzoni be ti lo, lo zia lege ti ye so lo ye ti sara na ala.

⁴⁶Lo sara si azo so agbu ala si ague na ala na kodro wande, azo ni akiri abaa mawa ti ala.

⁴⁷KOTA GBIA Nzapa ti e, mo soo e maa! Zi e na popo ti amara nde, mo bongbi e na ndo oko, tongaso fade e yeke sepela iri ti mo so ayeke nde si ayeke nzoni kue. Fade e yeke pika kate ti e, ngbanga ti so e yeke sepela mo.

⁴⁸Singila na KOTA GBIA, Nzapa ti Israel, ngbene ye lakue lakue, kpu na kpu! Ayeke nzoni azo kue atene: “Amen! Aleluya!”