Read sango Abia (Psaumes) 107 Bible Online

Abia (Psaumes) 107 - sango bible

Abia (Psaumes) 107

¹Ala sepela *KOTA GBIA, ngbanga ti so lo yeke nzoni, nzoni be ti lo angba kpu na kpu!

²Ala so KOTA GBIA azi ala, ala so lo zi ala na maboko ti awato, ayeke nzoni ala tene tongaso.

³Ala so lo mu ala na ya ti akodro kue ti To na ti Do, ti Banga na ti Mbongo si lo bongbi ala na ndo oko so, ayeke nzoni ala tene tongaso.

⁴Ambeni ahon kirikiri na ya ti benyama, na ndo so ngu ayeke daa pepe, ala ye ti si na mbeni gbata so azo ayeke daa, me ala wara lege ni pepe.

⁵Nzara ti kobe na ti ngu ahon ndö ti ala si be ti ala awoko mingi.

⁶Tongaso na ya ti ye ti ngangu so asi na ala, ala dekongo na KOTA GBIA si lo zi ala na ya ti mbeto ti ala.

⁷Lo fa na ala lege so ague mbirimbiri ti si na mbeni gbata so azo ayeke daa.

⁸Ayeke nzoni ala sepela KOTA GBIA ndali ti nzoni be ti lo! Ala sepela lo ndali ti aye ti kpene so lo yeke sara ndali ti azo!

⁹Biani, lo mu ngu na azo so go ti ala ahole, lo mu gba ti kobe na azo so ayeke kui na nzara.

¹⁰Ambeni ayeke lango na ndo so avuko pitipiti, a kanga ala na zingiri si pasi ahon ndö ti ala,

¹¹ngbanga ti so ala ke ti sara ye alingbi na atënë ti yanga ti Nzapa; ye so Nzapa so ayeke na yayu kâ na ndö ti aye kue aleke na be ti lo ti sara, ala baa ni tongana mbumbuse ye.

¹²Lo sara si ala woko kue na bango pasi, ala ti si zo oko ti mu maboko na ala ayeke daa pepe.

¹³Tongaso na ya ti ye ti ngangu so asi na ala, ala dekongo na KOTA GBIA si lo soo ala na ya ti mbeto ti ala.

¹⁴Lo zi ala na ndo so avuko pitipiti si lo fâ ya ti azingiri ti ala.

¹⁵Ayeke nzoni ala sepela KOTA GBIA ndali ti nzoni be ti lo! Ala sepela lo ndali ti aye ti kpene so lo yeke sara ndali ti azo!

¹⁶Biani, lo kungbi ayanga ti da so a sara na bengba wen si lo fâ kota wen ti kangango na yanga ti da.

¹⁷Ambeni aga azo ti buba ndali ti sarango ye ti kirikiri ti ala, ala ga azo ti mawa ndali ti sioni ti ala.

¹⁸Kobe kue anzere na yanga ti ala pepe, ala ga nduru na kuâ.

¹⁹Tongaso na ya ti ye ti ngangu so asi na ala, ala dekongo na KOTA GBIA si lo soo ala na ya ti mbeto ti ala.

²⁰Lo tokua tënë ti lo ti kai kobela ti ala, lo zi ala na ya ti kuâ so ala yeke daa.

²¹Ayeke nzoni ala sepela KOTA GBIA ndali ti nzoni be ti lo! Ala sepela lo ndali ti aye ti kpene so lo yeke sara ndali ti azo!

²²Ayeke nzoni ala ya na lo *sandaga ti mungo singila, ala dekongo na ngia ti fa tënë ti aye so lo sara.

²³Ambeni atambula na mangboko na le ti kota ngu-ingo, ala yeke sara kua na le ti kota ngu.

²⁴Azo so laa abaa aye so KOTA GBIA asara, na aye ti kpene so lo sara na le ti kota ngu-ingo ni.

²⁵Gi so lo tene tënë, kota pupu alondo ti ya, pupu ni asara si *amapo alondo.

²⁶Amapo abi amangboko ni na le ti nduzu, akiri na ala yongoro na gbeni kâ; be ti azo ni kue afun ndali ti ye ti ngangu so asi na ala.

²⁷Li ti ala aga kirikiri si ala yeke tambula tongana zo so samba ahon ndö ti lo, ala hinga ye so ala lingbi ti sara pepe.

²⁸Tongaso na ya ti ye ti ngangu so asi na ala, ala dekongo na KOTA GBIA si lo zi ala na ya ti mbeto ti ala.

²⁹Lo sara si kota pupu ni akai si amapo ni ade.

³⁰Tere ti ala anzere, ngbanga ti so ndo akiri ade. KOTA GBIA ague na ala na ndo so ala ye ti gue daa.

³¹Ayeke nzoni ala sepela KOTA GBIA ndali ti nzoni be ti lo! Ala sepela lo ndali ti aye ti kpene so lo yeke sara ndali ti azo!

³²Ayeke nzoni ala fa na ya ti bongbi ti azo ti kodro so lo yeke kota, ala sepela lo na ya ti bongbi ti *akangba.

³³Lo lingbi ti sara si *abale aga benyama, ali ti ngu aga kuru sese,

³⁴sese so kobe ale daa nzoni aga sese ti ingo ndali ti sioni ti azo ti kodro ni.

³⁵Lo lingbi ti sara si benyama aga ndo so gba ti ngu ayeke daa si kuru sese aga sese so ali ti ngu ayeke daa.

³⁶Lo yeke sara si azo so nzara asara ala asara kodro kâ, ala leke gbata ti ala kâ,

³⁷ala lu akobe na yaka, ala sara yaka ti vinye si ala wara alengo ni.

³⁸Lo yeke sara tufa na ndö ti ala, lo yeke sara si ala wu mingi si wungo ti anyama ti ala akiri aga kete pepe.

³⁹Me wungo ti ambeni akiri na peko, ala ba na gbe ti pasi, na gbe ti mawa nga na gbe ti ye ti ngangu.

⁴⁰KOTA GBIA abi kamene na le ti akota zo, lo sara si ala tambula kirikiri na benyama so lege ayeke daa pepe.

⁴¹Me azo so ye atia ala, lo yeke zi ala na ya ti pasi, lo yeke sara si asewa ti ala awu mingi tongana anyama ti ala.

⁴²Azo ti mbirimbiri abaa aye ni so si ala yeke na ngia, azo ti sioni kue ayeke kanga yanga ti ala.

⁴³Zo so ayeke na ndara, fade lo yeke gbu li ti lo na ndö ti aye ni si lo yeke hinga lo tene, KOTA GBIA ayeke sara nzoni be.