Read sango Abia (Psaumes) 11 Bible Online

Abia (Psaumes) 11 - sango bible

Abia (Psaumes) 11

¹Bia ti David; bia so ayeke ndali ti makonzi-bia. *KOTA GBIA ayeke ndo so mbi kpe daa ti bata tere ti mbi. Ngbanga ti nyen si ala tene na mbi, atene: “Kpe mo gue na ndö ti ahoto tongana ndeke!”?

²Baa, azo ti sioni agboto ya ti kokora ti ala, ala zia le ni na ndö ti kamba ni; ala duti na ya ti vukongo ndo si ala yeke tokua ale ti kokora ni na tere ti azo so be ti ala avuru.

³So gigi ni kue abuba awe so, nyen laa zo ti mbirimbiri alingbi ti sara, nyen?

⁴KOTA GBIA ayeke na ya ti kota da ti lo so ayeke nde si ayeke nzoni kue. Mbata ti lo ti gbia ayeke na yayu. Lo yeke baa ndo na ndö ti sese kue, le ti lo ayeke baa azo oko oko kue ti tara ala.

⁵Be ti KOTA GBIA anzere na zo ti mbirimbiri; me be ti lo ake zo ti sioni nga na zo so kua ti lo ayeke ti sara ngangu na amba ti lo.

⁶Lo yeke sara si ale ti wâ na *sufre atuku na ndö ti azo ti sioni tongana ngu-Nzapa si pupu ti wâ aga agbi ala. Ye so ayeke ku ala so laa!

⁷Biani, KOTA GBIA ayeke mbirimbiri, sarango ye ti mbirimbiri laa anzere na lo; azo so sarango ye ti ala ayeke na legeni laa ayeke baa ande le ti lo.