Read sango Abia (Psaumes) 111 Bible Online

Abia (Psaumes) 111 - sango bible

Abia (Psaumes) 111

¹Aleluya! Mbi ye ti sepela *KOTA GBIA na be ti mbi kue! Mbi ye ti sepela lo na ya ti bongbi ti azo ti mbirimbiri nga na ya ti bongbi ti azo ti lo kue.

²Aye so KOTA GBIA asara ayeke kota mingi; azo so aye ni anzere na ala, ala yeke gi ti hinga nda ni.

³Aye so lo sara ayeke pendere mingi si ane mingi; batango tënë ti yanga ti lo so lo yeke bata angba kpu kpu.

⁴Lo ye titene azo adabe ti ala na aye ti kpene so lo sara; KOTA GBIA ayeke sara nzoni be na zo si lo yeke baa mawa ti zo.

⁵Lo mu kobe na azo so akpe mbeto ti lo; lo yeke dabe ti lo na *mbuki ti lo lakue.

⁶Lo fa na azo ti lo ngangu ti aye so lo sara: lo zi kodro ti amara nde na maboko ti ala ti mu na azo ti lo titene aga ye ti ala.

⁷Aye so lo sara ayeke na legeni si ayeke mbirimbiri; andia ti lo kue alingbi titene zo azia be ti lo daa.

⁸A lu ni si angba lakue lakue, kpu na kpu; a sara ni na lege ti mbirimbiri nga na lege ti taa-tënë.

⁹KOTA GBIA atokua titene a zi azo ti lo na gbe ti ngbaa, lo na azo ti lo ni aga ambuki kpu na kpu. Iri ti lo ayeke nde si ayeke nzoni kue, ayeke zia mbeto na be ti zo.

¹⁰Kpengo mbeto ti KOTA GBIA ayeke tongo nda ti dutingo na ndara. Azo so kue akpe mbeto ti lo ayeke azo ti hingango ndo. Gonda ti lo angba kpu na kpu.