Read sango Abia (Psaumes) 115 Bible Online

Abia (Psaumes) 115 - sango bible

Abia (Psaumes) 115

¹*KOTA GBIA, e pepe; e laa e lingbi na gonda pepe, me gonda ni alingbi na mo, ndali ti nzoni be ti mo nga ndali ti batango tënë ti yanga ti mo so mo yeke bata.

²Ngbanga ti nyen si amara nde ayeke hunda ndo, atene: “Nzapa ti ala ni ayeke na ndo wa?”

³Nzapa ti e ayeke na yayu, lo yeke sara ye so kue be ti lo aye.

⁴Anzapa ti amara nde, a sara ala na wen ti nginza nga na lôro, maboko ti zo laa asara ala.

⁵Ala yeke na yanga, me ala yeke tene tënë pepe; ala yeke na le, me ala yeke baa ndo pepe.

⁶Ala yeke na mê, me ala yeke ma ndo pepe, ala yeke na hon, me ala yeke ma fion ti ye pepe.

⁷Ala yeke na maboko, me ala yeke ndu ye pepe, ala yeke na gere, me ala yeke tambula pepe; mbeni tënë oko ayeke sigigi na yanga ti ala pepe.

⁸Azo so asara anzapa ni, azo so azia be ti ala na ndö ti anzapa ni, ayeke nzoni ala ga tongana ala.

⁹Ala azo ti Israel, ala zia be ti ala na ndö ti KOTA GBIA! — Lo laa lo yeke mu maboko na ala; lo yeke *vala ti ala!

¹⁰Ala *ahale ti Aaron, ala zia be ti ala na ndö ti KOTA GBIA! — Lo laa lo yeke mu maboko na ala; lo yeke vala ti ala!

¹¹Ala so ayeke kpe mbeto ti KOTA GBIA, ala zia be ti ala na ndö ti KOTA GBIA! — Lo laa lo yeke mu maboko na ala; lo yeke vala ti ala!

¹²KOTA GBIA adabe ti lo na e, fade lo yeke sara tufa na ndö ti e. Fade lo yeke sara tufa na ndö ti amara ti Israel, lo yeke sara tufa na ndö ti ahale ti Aaron.

¹³Lo yeke sara tufa na ndö ti azo so akpe mbeto ti lo, akete zo na akota zo.

¹⁴Ayeke nzoni KOTA GBIA asara si ala wu mingi, ala na amolenge ti ala kue!

¹⁵Ayeke nzoni KOTA GBIA so asara yayu na sese, asara tufa na ndö ti ala!

¹⁶Yayu ayeke yayu ti KOTA GBIA, me ti sese, lo mu ni na azo.

¹⁷Akuâ laa ayeke gonda KOTA GBIA pepe, azo so ague na ndo so ndo ade daa ngii laa ayeke gonda KOTA GBIA pepe.

¹⁸Me ti e, e yeke mu singila na KOTA GBIA ti londo fadeso ti gue na ni, kpu na kpu. Aleluya!