Read sango Abia (Psaumes) 143 Bible Online

Abia (Psaumes) 143 - sango bible

Abia (Psaumes) 143

¹Bia ti David. *KOTA GBIA, ma sambela ti mbi, dingi mê ti mo, mo ma totongo tere ti mbi. Ndali ti so mo yeke bata tënë ti yanga ti mo si mo yeke mbirimbiri, kiri tënë na mbi!

²Mbi yeke zo ti kua ti mo, fâ ngbanga na li ti mbi pepe, ngbanga ti so na le ti mo, zo ti mbirimbiri ayeke daa pepe.

³Wato atumba peko ti mbi, lo kinda mbi na sese, lo do ya ti mbi; lo sara si mbi lango na ya ti vukongo ndo tongana azo so akui ando so.

⁴Be ti mbi awoko kue awe, ngangu atia na be ti mbi kue awe.

⁵Mbi dabe ti mbi na alango ti giriri, mbi gbu li ti mbi na ndö ti aye so kue mo sara, be ti mbi ati na ndö ti aye so maboko ti mo asara.

⁶Mbi yoro maboko ti mbi na mbage ti mo, mbi laa na dawa ti mo tongana sese so aye ngu. Luti kete

⁷KOTA GBIA, kiri tënë na mbi hio, be ti mbi awoko kue awe! Honde le ti mo na mbi pepe, tongaso pepe, fade mbi yeke ga tongana azo so ayeke li na ya ti du ti kuâ.

⁸Gi na ndaperere, tene na mbi tënë ti nzoni be ti mo, ngbanga ti so mbi zia be ti mbi na ndö ti mo; fa na mbi lege so mbi lingbi ti tambula daa, ngbanga ti so mbi yeke baa ndo gi na mo.

⁹KOTA GBIA, zi mbi na maboko ti awato ti mbi; mbi kpe na mo ti honde tere ti mbi.

¹⁰Fa na mbi lege ti sara ye so be ti mo aye, ngbanga ti so mo yeke Nzapa ti mbi. Ayeke nzoni yingo ti mo so ayeke nzoni afa na mbi lege so ague na sese so a leke ni nzoni.

¹¹KOTA GBIA, ndali ti iri ti mo, sara si mbi ngba na fini; na lege ti mbirimbiri ti mo, zi mbi na ya ti ye ti ngangu.

¹²Na lege ti nzoni be ti mo, fade mo yeke hunzi awato ti mbi, mo yeke sara si azo so kue be ti ala ake mbi akui, ngbanga ti so mbi yeke zo ti kua ti mo.