Read sango Abia (Psaumes) 16 Bible Online

Abia (Psaumes) 16 - sango bible

Abia (Psaumes) 16

¹Sambela ti ya ti be ti David. Nzapa, bata mbi, mo laa mbi kpe na mo ti bata tere ti mbi!

²Mbi tene na *KOTA GBIA, mbi tene: “Mo laa mo yeke Kota Gbia ti mbi! Anzoni ye ti mbi kue alondo gi na mo.”

³Na ya ti kodro so, anzapa nde nde ayeke daa, mbi yeke ne ando ala mingi, me ti fadeso, mbi tene:

⁴Azo so ayeke kpe na peko ti anzapa nde so, fade pasi ti ala ayeke hon ndoni. Ti mbi, mbi yeke kiri ti mu mene ti anyama na *sandaga na ala pepe, mbi yeke kiri ti di iri ti anzapa ni na yanga ti mbi pepe.

⁵KOTA GBIA, mo laa mo yeke ye so ayeke ga ti mbi, mo laa mo yeke nzoni ye so mbi wara; gigi ti mbi ayeke gi na maboko ti mo.

⁶Sese so a haka ti mu na mbi ayeke pendere mingi. Ti mbi, ye so mbi wara ayeke nzoni ahon ndoni.

⁷Mbi mu singila na KOTA GBIA so ayeke mu na mbi wango: ataa na bi, be ti mbi angba na ndö ti wango ni.

⁸Le ti mbi angba na ndö ti KOTA GBIA lakue. So lo yeke na mbage ti maboko ti mbi ti koli, mbeni ye ti yingi mbi ayeke daa pepe.

⁹Nilaa, be ti mbi ayeke duti na ngia, mbi yeke dodo na ngia si mbeni sioni ye ti si na mbi ayeke daa oko pepe.

¹⁰Biani, mo yeke zia mbi na ndo ti akuâ pepe, mo yeke zia mbi, zo ti mo titene mbi fun na ya ti du ti kuâ pepe.

¹¹Mo yeke fa na mbi lege ti duti na fini; na dawa ti mo, ngia asi singo, na mbage ti maboko ti mo ti koli, anzerengo ye ayeke daa kpu na kpu!