Read sango Abia (Psaumes) 17 Bible Online

Abia (Psaumes) 17 - sango bible

Abia (Psaumes) 17

¹Sambela ti David. *KOTA GBIA, ma tënë ti mbi, tënë ni ayeke na legeni; dingi mê ti mo, mo ma toto ti mbi na sambela ti mbi: tënë ti handango zo ayeke na yanga ti mbi pepe.

²Ayeke nzoni mo laa mo fâ ngbanga ti mbi si aduti na legeni. Baa mbirimbiri, zo wa laa tënë ti lo ayeke na legeni.

³Mo gi ya ti atënë ti be ti mbi awe. Na bi, mo ga ti gi ti hinga mbi nzoni, mo tara be ti mbi, mo wara ye oko pepe; tënë so mbi gbu li ti mbi daa, ni laa asigigi na yanga ti mbi pepe.

⁴Ataa so sarango ye ti ambeni zo ayeke kirikiri, mbi sara ye alingbi na tënë ti yanga ti mo, mbi mu peko ti azo ti sioni yanga pepe;

⁵mbi ngba ti tambula lakue na lege ti mo, gere ti mbi ahon mbage na mbage pepe.

⁶Nzapa ti mbi, mbi iri mo, ngbanga ti so mo yeke kiri tënë na mbi. Dingi mê ti mo na mbage ti mbi, ma tënë ti mbi.

⁷Fa na mbi kota nzoni be ti mo, mo so mo yeke soo azo so akpe na mo ti bata tere ti ala; na lege ti ngangu ti mo, mo sara si ala kpe na maboko ti awato ti ala.

⁸Bata mbi tongana mboma ti le ti mo, honde mbi na gbe ti maboko ti mo tongana ti so ndeke ayeke bata amolenge ti lo na gbe ti *kpangi ti lo.

⁹Honde mbi yongoro na tere ti azo ti sioni so anika mbi so; honde mbi yongoro na tere ti awato so angoro mbi ti fâ mbi so.

¹⁰Ala yeke baa mawa ti zo pepe, tënë ti baba asi singo na yanga ti ala.

¹¹Ala yeke tumba peko ti mbi, fadeso ala ngoro mbi awe. Le ti ala ayeke na ndö ti mbi, ala yeke ku ti kinda mbi na sese.

¹²Ala yeke tongana bamara so be ti lo ayeke do dongo ti suru ya ti nyama, ala yeke tongana sioni nyama so ahonde tere ti lo ti ku ti gbu mbeni nyama.

¹³KOTA GBIA, londo, gue na tere ti ala, mo kinda ala! Na lege ti yongoro zeme ti mo, mo zi mbi na maboko ti azo ti sioni.

¹⁴KOTA GBIA, na maboko ti mo wani, ayeke nzoni mo tumba ala na popo ti azo, mo zi ala na ndö ti sese so! Ye so alingbi na ala na ndö ti dunia so laa! Ayeke nzoni ala nyon sengo ye so mo bata ndali ti ala; ala nyon ni asi ya ti ala. Ayeke nzoni amolenge ti ala anyon alingbi na ala, tanga ni angba ndali ti atara ti ala.

¹⁵Ti mbi, fade mbi yeke baa le ti mo, ngbanga ti so mbi yeke mbirimbiri. Tongana mbi zingo na lango, mbi yeke baa le ti mo, mbi yeke baa ni ngbii be ti mbi ade.