Read sango Abia (Psaumes) 19 Bible Online

Abia (Psaumes) 19 - sango bible

Abia (Psaumes) 19

¹Bia ti David; bia so ayeke ndali ti makonzi-bia.

²Yayu ayeke fa gonda ti Nzapa, le ti nduzu ayeke fa aye so maboko ti lo asara.

³Lango oko oko ayeke tene tënë ni na mbeni lango so ayeke ga na peko ni, bi oko oko ayeke fa nda ni na mbeni bi so ayeke ga na peko ni.

⁴Ala yeke na yanga pepe, ala yeke tene tënë pepe, zo alingbi ti ma go ti ala pepe.

⁵Me fango ye ti ala ague, asi na azo ti sese kue, tënë ti ala ague ngbii asi na azo ti dunia kue. Kâ na nduzu, Nzapa aleke mbeni ndo titene lâ aduti daa.

⁶Na ndaperere, lâ ayeke sigigi tongana fini koli so ayeke sigigi na ya ti kubu ti lo, tongana wanguru so ayeke na ngia ti mu loro.

⁷Lo londo na mbeni mbage ti le ti nduzu, lo gue ngbii lo si na mbeni mbage ti le ti nduzu ni; ye kue ayeke na gbe ti ngangu ti sungo ti lo.

⁸*Ndia ti *KOTA GBIA ayeke nzoni kue, ndia ni ayeke kiri ngangu na fini ti zo. Yanga so KOTA GBIA amu alingbi titene zo azia be ti lo daa, ayeke mu ndara na zo so ahinga ndo pepe.

⁹Andia ti KOTA GBIA ayeke mbirimbiri, andia ni ayeke zia ngia na be ti zo. Atënë ti ndia ti KOTA GBIA avuru nzoni mingi, tënë ni asara si le ti zo azi nzoni.

¹⁰Kpengo mbeto ti KOTA GBIA, mbeni ye ti nzoni ti hon so ayeke daa pepe; kpengo mbeto ti KOTA GBIA angba lakue lakue. Fango ngbanga ti KOTA GBIA ayeke taa-tënë, fango ngbanga ni kue ayeke mbirimbiri.

¹¹Aye ni kue ayeke nzoni mingi ahon lôro, ahon gba ti lôro ti nzoni ni; aye ni anzere ahon mafuta ti wotoro, anzere ahon mafuta ti wotoro ti nzoni ni.

¹²Atënë ni azi nga le ti mbi, zo ti kua ti mo; zo ayeke wara ye mingi na lege ti batango atënë ni.

¹³Zo wa laa alingbi ti hinga asiokpari so kue lo sara? Asiokpari so mbi hinga pepe, mo zi ni na li ti mbi.

¹⁴Mo zia nga mbi, zo ti kua ti mo, yongoro na tere ti azo ti baba; mo sara si mbi mu peko ti ala na sarango ye ti ala pepe. Tongaso, fade mbi yeke ga zo so alingbi kue si a bi tënë ti kota sioni ye na li ti mbi pepe.

¹⁵Ayeke nzoni atënë ti yanga ti mbi na atënë ti be ti mbi anzere na be ti mo; KOTA GBIA, mo yeke têne so mbi luti na ndö ni ti bata tere ti mbi, mo yeke wasongo mbi.