Read sango Abia (Psaumes) 21 Bible Online

Abia (Psaumes) 21 - sango bible

Abia (Psaumes) 21

¹Bia ti David; bia so ayeke ndali ti makonzi-bia.

²*KOTA GBIA, be ti gbia anzere mingi ndali ti ngangu ti mo. Be ti gbia asi na ngia ndali ti so mo sara si lo so benda awe!

³Mo mu na lo ye so be ti lo aye; ye so lo hunda na mo, mo gbanzi ni na lo pepe. Luti kete

⁴Mo ga ti sara tufa na ndö ti lo, mo ga ti mu na lo anzoni ye mingi; mo zia kpoto ti lôro na li ti lo.

⁵Lo hunda na mo fini, mo mu ni na lo awe: fini so ayeke ninga si angba kpu na kpu.

⁶Iri ti lo awu mingi ndali ti so mo so benda awe; mo mu na lo gonda na nengo mingi.

⁷Mo sara tufa na ndö ti lo, tufa ni angba lakue lakue. So mo yeke na tere ti lo, be ti lo asi singo na ngia.

⁸Biani, gbia azia be ti lo na ndö ti KOTA GBIA; ndali ti nzoni be ti Nzapa so ayeke na yayu kâ na ndö ti aye kue, fade mbeni ye ti yingi gbia ayeke daa pepe.

⁹Gbia, mo yeke gbu awato ti mo; azo so ake mo ayeke ti na ya ti maboko ti mo.

¹⁰So mo yeke si na ala, mo yeke gbi ala na le ti kota wâ. Na lege ti ngonzo ti KOTA GBIA, lo yeke hunzi ala kue, mbeni wâ ayeke gbi ala kue.

¹¹Mo yeke zi *ahale ti ala na ndö ti sese so, mo yeke zi mara ti ala na popo ti azo.

¹²Tongana ala gi lege ti sara sioni na mo si ala leke tënë na tere ti mo, ala yeke ha gbaa.

¹³Biani, mo yeke sara si ala kpe kirikiri, mo yeke gboto ya ti kokora ti mo ti pika na ala.

¹⁴KOTA GBIA, londo mo fa ngangu ti mo! E ye ti he bia ti gonda na mo, e yeke pika mozoko na mo ndali ti akota ye so mo sara.