Read sango Abia (Psaumes) 22 Bible Online

Abia (Psaumes) 22 - sango bible

Abia (Psaumes) 22

¹Bia ti David; bia so ayeke ndali ti makonzi-bia. A he ni na go ti bia so iri ni “Tagba ti ndaperere”.

²Nzapa ti mbi, Nzapa ti mbi, mo zia mbi ngbanga ti nyen? Mbi toto na mo gbaa, mo ga ti soo mbi pepe, mo ngba yongoro na mbi ngbanga ti nyen?

³Nzapa ti mbi, na kota lâ, mbi iri mo, me mo kiri tënë pepe; na bi, mbi kiri mbi iri ndo gbaa, mbi wu tere ti mbi pepe.

⁴Andaa mo yeke nde si mo yeke nzoni kue, mo duti na ndö ti mbata ti mo ti gbia, mo laa azo ti Israel ayeke gonda mo.

⁵Ando, akotara ti e azia be ti ala na ndö ti mo, ala zia be ti ala na ndö ti mo si mo zi ala na ya ti ye ti sioni.

⁶Ala dekongo na mo si mo zi ala na ya ti pasi; ala zia be ti ala na ndö ti mo si kamene agbu le ti ala pepe.

⁷Ti mbi, mbi yeke zo mbeni pepe, mbi yeke tongana ngusu; azo ayeke zonga mbi, ala yeke baa mbi tongana mbeni mbumbuse zo.

⁸Azo so kue abaa mbi, ala yeke he mbi hengo; ala yeke sara yanga ti ala si ala yeke yingi li ti ala.

⁹Ala tene: “Lo zia be ti lo na ndö ti *KOTA GBIA! Ka KOTA GBIA ni azi lo e baa ma! So KOTA GBIA aye lo mingi so, ka lo zi lo na ya ti ye ti sioni ma!”

¹⁰KOTA GBIA, mo sara si mbi sigigi na ya ti mama ti mbi; mo sara si mbi duti na siriri na ndö ti kate ti lo.

¹¹So mbi baa gigi awe, ala mu mbi na mo! So mbi de na ya ti mama ti mbi, mo yeke Nzapa ti mbi.

¹²Duti yongoro na mbi pepe, ngbanga ti so ye ti ngangu aga nduru ti si na mbi si zo ti mu maboko na mbi ayeke daa pepe.

¹³Awato gbani gbani angoro mbi, ala yeke tongana akoli-bagara; ala yeke tongana angangu bagara ti Bashan so angoro tere ti mbi kue.

¹⁴Ala yeke tongana abamara so ayeke toto, ala zi yanga ti ala na tere ti mbi si ala ye ti suru ya ti mbi surungo.

¹⁵Ngangu ti mbi ahon tongana ngu so ayeke sua; abio ti mbi kue awoko wokongo. Be ti mbi ayeke tongana puru ti wotoro, aga tongana ngu na ya ti mbi.

¹⁶Lege ti go ti mbi ahole kasakasa tongana fango ta ti sese, be ti mbi ahole kue na nzara ti ngu. Mo zia mbi na yanga ti du ti kuâ awe.

¹⁷Gba ti azo ti sioni angoro mbi kue, ala yeke tongana ambo so angoro tere ti mbi; ala koro ya ti amaboko ti mbi na agere ti mbi.

¹⁸Mbi nge kue si abio ti mbi kue ayeke na gigi. Awato ti mbi ayeke baa mbi, ala yeke baa gi mbi kpoo.

¹⁹Ala kangbi abongo ti mbi na popo ti ala; ala bi *dee ti mu na abongo ti mbi.

²⁰Ti mo, KOTA GBIA, mo ngba yongoro na mbi pepe! Mo so mo yeke ngangu ti mbi, mo ga hio, mo mu maboko na mbi!

²¹Mo soo mbi na ya ti kuâ ti ngangu, mo zi mbi na gbe ti maboko ti ambo!

²²Mo zi mbi na yanga ti bamara, mo zi mbi na le ti didi ti angbä! Âa! KOTA GBIA, mo ma mbi awe!

²³Fade mbi yeke tene tënë ti mo na a-ita ti mbi si mbi yeke gonda mo na ya ti bongbi ti azo ti mo:

²⁴“Ala so ayeke kpe mbeto ti KOTA GBIA, ala gonda lo! Ala azo ti mara ti Jacob kue, ala ne lo! Ala azo ti mara ti Israel kue, ala duti na mbeto ti lo!

²⁵KOTA GBIA abaa zo ti mawa tongana mbumbuse zo pepe, lo zia lo na ya ti pasi pepe. Tongana lo baa zo ti mawa, lo yeke bi le ti lo yongoro pepe, tongana zo ti mawa atoto na lo, lo ma.”

²⁶KOTA GBIA, ndali ti mo, mbi lingbi ti gonda mo, mbi gonda mo na ya ti kota bongbi ti azo ti mo. Ye so mbi deba yanga ti mbi ti sarango ni, mbi yeke sara ni na le ti azo so akpe mbeto ti mo:

²⁷Fade mbi yeke tisa azo so ye atia ala: ala yeke te ye, ya ti ala asi. Azo so ayeke gi KOTA GBIA, ayeke nzoni ala gonda lo, ala te gigi aninga, ala duti nzoni na ndö ti gigi ni!

²⁸Azo so ayeke na nda ti sese kue, ala dabe ti ala na KOTA GBIA, ala kiri na mbage ti lo! Asewa kue ti amara nde, ala kuku na gbe ti lo ti voro lo!

²⁹Biani, lengo-gbia ayeke ti KOTA GBIA, lo sara komandema na ndö ti amara kue.

³⁰Akota zo ti sese kue ayeke te ye, ala kuku ti voro lo. Azo so aga nduru na kuâ, azo so alingbi ti ngba na fini pepe, fade ala yeke kuku na gbe ti lo.

³¹*Ahale ti ala ayeke sara ande kua na lo, azo ayeke tene tënë ti KOTA GBIA, ala yeke tene tënë ti lo na azo ti ngoi so ayeke ga.

³²Azo ayeke fa tënë ti mbirimbiri ti lo, ala yeke fa ni na azo so a yeke du ala na peko, ala yeke tene tënë ti ye so Nzapa asara ti soo azo ti lo.