Read sango Abia (Psaumes) 24 Bible Online

Abia (Psaumes) 24 - sango bible

Abia (Psaumes) 24

¹Bia ti David. Sese so na aye ti ndö ni kue ayeke ti *KOTA GBIA. Dunia so na azo ti ndö ni kue ayeke ti lo.

²Lo laa lo zia sese na ndö ti akota ngu-ingo, lo gbu ni ngangu si aluti na ndö ti *abale.

³Zo wa laa ayeke ma na li ti hoto ti KOTA GBIA, zo wa? Zo wa laa ayeke duti na ya ti kota da ti lo, zo wa? Kota da ti lo so ayeke nde si ayeke nzoni kue so.

⁴Zo so maboko ti lo asara sioni oko pepe, zo so be ti lo avuru, zo so adeba yanga ti lo na tënë ti mvene pepe, zo so adeba yanga ti lo ti handa azo pepe.

⁵Fade KOTA GBIA ayeke sara tufa na ndö ti lo, fade Nzapa, wasongo lo ayeke baa lo zo ti mbirimbiri.

⁶So ayeke taa azo so ayeke gi Nzapa laa! Ala so ayeke gi le ti lo, so ayeke taa mara ti Jacob laa! Luti kete

⁷Ayanga ti da, ala zi tere ti ala kota! Ayanga ti da ti lakue lakue, ala zi tere ti ala! Ala zia lege si Gbia ti gonda ali!

⁸— Gbia ti gonda ni ayeke zo wa? — KOTA GBIA laa, lo so lo yeke ngangu, lo so lo yeke ngangu walombe, KOTA GBIA, ngangu zo ti bira.

⁹Ayanga ti da, ala zi tere ti ala kota! Ayanga ti da ti lakue lakue, ala zi tere ti ala! Ala zia lege si Gbia ti gonda ali!

¹⁰— Gbia ti gonda ni ayeke zo wa? — KOTA GBIA laa, lo so lo yeke na ndö ti dunia kue. Lo laa lo yeke Gbia ti gonda ni. Luti kete