Read sango Abia (Psaumes) 31 Bible Online

Abia (Psaumes) 31 - sango bible

Abia (Psaumes) 31

¹Bia ti David; bia so ayeke ndali ti makonzi-bia.

²*KOTA GBIA, mbi kpe na mo ti bata tere ti mbi; mo zia kamene na le ti mbi oko pepe! Mo zi mbi na lege ti mbirimbiri ti mo.

³Dingi mê ti mo ti ma mbi. Zi mbi hio si! Mbi ye titene mo ga kota têne so mbi kpe ti gue na ndö ni ti bata tere ti mbi; mo ga ngangu gbagba so fade ayeke soo mbi.

⁴Mo laa mo yeke kota têne so mbi luti na ndö ni ngangu; mo yeke ngangu gbagba ti mbi. Ndali ti iri ti mo, fade mo yeke fa lege na mbi, mo yeke gbu maboko ti mbi ti tambula na mbi.

⁵Fade mo yeke sara si mbi sigigi na ya ti gbanda so azo aleke ti gbu na mbi. Biani, mo laa mo yeke ngangu gbagba ti mbi.

⁶Mbi zia fini ti mbi na maboko ti mo. KOTA GBIA, mo so mo yeke taa Nzapa so, mo laa mo zi mbi na ya ti kuâ.

⁷Be ti mbi ake azo ti vorongo abuba nzapa; ti mbi, mbi zia be ti mbi na ndö ti KOTA GBIA.

⁸Mbi yeke dodo na ngia, tere ti mbi anzere ndali ti nzoni be ti mo. Biani mo baa mawa ti mbi, mo hinga ye ti ngangu so asi na mbi.

⁹Mo zia mbi na maboko ti awato ti mbi pepe; mo sara si mbi luti na ndö ti gere ti mbi si mbi wu pupu.

¹⁰KOTA GBIA, baa mawa ti mbi! Ye ti ngangu ahon ndö ti mbi. Mbi toto ngbii le ti mbi asuku, go ti mbi akanga, mbi woko kue.

¹¹Fini ti mbi ayeke hunzi gi na ya ti vundu, alango ti fini ti mbi gi na ya ti demango tere. Ngangu ti mbi ahunzi ndali ti siokpari ti mbi; abio ti tere ti mbi kue awoko.

¹²Awato ti mbi kue ayeke zonga mbi; azo so alango nduru na mbi, ti ala ahon ndoni. Azo so ahinga mbi, mbeto ti mbi ayeke sara ala sarango; tongana ala baa mbi na lege, ala yeke kpe mbi kpengo.

¹³Be ti azo agirisa na mbi tongana ti so be ti azo ayeke girisa na zo so akui awe. Mbi yeke tongana gbagba ta so a bi ni awe.

¹⁴Mbi yeke ma atënë ti mvene so azo ayeke tene na iri ti mbi, atene: “Lo yeke zia mbeto na be ti azo mbage na mbage kue!” Ala ma tere na popo ti ala na tere ti mbi, ala leke tënë ti fâ mbi.

¹⁵Me, mbi zia be ti mbi na ndö ti mo KOTA GBIA. Mbi tene: “Gi mo laa mo yeke Nzapa ti mbi.”

¹⁶Gigi ti mbi ayeke lakue na maboko ti mo. Zi mbi na maboko ti awato ti mbi, ala so ayeke tumba peko ti mbi so.

¹⁷Mbi, zo ti kua ti mo, baa mbi na nzoni le! Na lege ti nzoni be ti mo, soo mbi na kuâ!

¹⁸KOTA GBIA, tongana mbi iri mo, ayeke nzoni mo zia kamene na le ti mbi pepe. Me ayeke nzoni kamene agbu le ti asioni zo so. Ayeke nzoni yanga ti ala akanga si ala gue na ndo ti akuâ.

¹⁹Ayeke nzoni ala ga abuburu, azo ti tenengo mvene so. Ala yeke tene atënë ti baba, ala yeke zonga zo ti mbirimbiri si ala yeke baa lo tongana mbumbuse zo.

²⁰KOTA GBIA, anzoni ye ti mo ayeke mingi! Mo bata aye ni so na azo so akpe mbeto ti mo. Azo so kue akpe na mo ti bata tere ti ala, mo yeke mu aye ni na ala na le ti azo kue.

²¹Mo yeke honde ala na ndo so mo yeke daa; mo yeke bata ala si azo ti sarango mbana asara mbana na ala pepe. Mo yeke bata ala si azo ti sioni yanga atene sioni tënë na tere ti ala pepe.

²²Mbi mu singila na KOTA GBIA! Mbi yeke lani tongana gbata so azo aye ti mu ni na lege ti bira; me nzoni be ti lo asara aye ti kpene ndali ti mbi.

²³So li ti mbi aga kirikiri awe, mbi tene na be ti mbi, mbi tene: “A tumba mbi yongoro na le ti mo awe.” Me mo ma toto ti mbi na ngoi so mbi iri mo.

²⁴Ala so kue ayeke azo ti KOTA GBIA, ala ye lo! KOTA GBIA ayeke bata azo so ama na be na lo. Me ti azo ti baba, lo yeke kiri na ala peko ti baba ti ala ni.

²⁵Azo so kue azia be ti ala ti ku KOTA GBIA, ala gbu ngangu, ala kanga be ti ala!