Read sango Abia (Psaumes) 34 Bible Online

Abia (Psaumes) 34 - sango bible

Abia (Psaumes) 34

¹Bia ti David. Na le ti Abimelek, David asara tere ti lo tongana zo ti fuu. Abimelek atumba lo; na ndembe so David ahon, lo he bia so, lo tene:

²Fade mbi yeke mu singila na *KOTA GBIA na ngoi kue; yanga ti mbi ayeke ngba lakue ti gonda lo.

³Mbi yeke pika kate ti mbi ndali ti KOTA GBIA; ala asenge zo, ala ma mbi, ala duti na ngia!

⁴Ala gonda KOTA GBIA legeoko na mbi; e kue yanga oko, e mu iri ti lo na nduzu.

⁵Mbi gi KOTA GBIA, mbi sambela lo si lo kiri tënë na mbi, lo zi mbeto kue na be ti mbi.

⁶Azo so abaa ndo na mbage ti lo, le ti ala ayeke za zango na ngia, kamene ayeke gbu le ti ala pepe.

⁷Zo ti mawa adekongo, KOTA GBIA ama lo si lo zi lo na ya ti aye ti ngangu kue.

⁸*Ange ti KOTA GBIA ayeke sara sanziri na tere ti azo so akpe mbeto ti lo; lo yeke zi ala na ya ti ye ti ngangu.

⁹Ala tara KOTA GBIA, fade ala baa so lo yeke nzoni. Ti lo nzoni, zo so akpe na KOTA GBIA ti bata tere ti lo!

¹⁰Ala azo so KOTA GBIA azia ala nde ndali ti lo, ala kpe mbeto ti lo! Biani, azo so ayeke kpe mbeto ti lo, ye ayeke tia ala pepe.

¹¹Ye ayeke tia ka abamara tiango si nzara ayeke sara ka ala sarango. Me azo so ayeke gi KOTA GBIA, nzoni ye ayeke tia ala oko pepe.

¹²Amolenge ti mbi, ala ga, ala ma mbi si! Fade mbi yeke fa na ala lege ti kpengo mbeto ti KOTA GBIA.

¹³Zo wa laa aye tënë ti gigi ti lo, zo wa? Zo wa laa aye nga ti duti nzoni, zo wa?

¹⁴Alingbi mo bata yanga ti mo na sioni tënë, mo bata yanga ti mo na atënë ti mvene.

¹⁵Mo ke lege ti sioni ye, mo sara nzoni ye; mo gi lege ti siriri, mo ngba daa.

¹⁶Le ti KOTA GBIA ayeke na ndö ti azo ti mbirimbiri, mê ti lo ayeke ma dekongo ti ala.

¹⁷Me KOTA GBIA ake azo ti sarango sioni, lo ye ti zi iri ti ala biani biani na ndö ti dunia so.

¹⁸Tongana azo ti mbirimbiri adekongo na KOTA GBIA, lo yeke ma ala si lo yeke zi ala na ya ti aye ti ngangu kue.

¹⁹KOTA GBIA ayeke nduru na azo so be ti ala afâ, lo yeke soo ala so be ti ala awoko.

²⁰Aye ti sioni mingi ayeke si na zo ti mbirimbiri, me KOTA GBIA ayeke zi lo lakue na ya ni.

²¹KOTA GBIA ayeke bata lo nzoni si bio ti lo oko afâ pepe.

²²Sioni ti zo ti sioni laa ayeke fâ lo; ti awato ti azo ti mbirimbiri, fade a yeke fâ ngbanga na li ti ala.

²³KOTA GBIA ayeke soo fini ti azo ti kua ti lo; ti azo so ayeke kpe na lo ti bata tere ti ala, fade a yeke fâ ngbanga na li ti ala pepe.