Read sango Abia (Psaumes) 35 Bible Online

Abia (Psaumes) 35 - sango bible

Abia (Psaumes) 35

¹Bia ti David. *KOTA GBIA, bi tënë na li ti azo so ayeke bi tënë na li ti mbi; tiri na azo so ayeke tiri na mbi.

²Gbu kete vala na kota vala, londo, mo mu maboko na mbi!

³Mu likongo, mo kanga lege na azo so ayeke sara ngangu na mbi. Mo tene na mbi: “Mbi laa mbi yeke soo mo!”

⁴Azo so aye kuâ ti mbi so, ayeke nzoni kamene agbu le ti ala si ala ti buba! Azo so aye ti sara sioni na mbi so, ayeke nzoni ala kiri na peko na gba ti kamene na le ti ala.

⁵Na ndembe so *ange ti KOTA GBIA ayeke tumba ala, ayeke nzoni ala ga tongana poro ti le ti kobe so pupu amu ahon na ni.

⁶Na ndembe so ange ti KOTA GBIA ayeke tumba peko ti ala, ayeke nzoni lege ti ala avuko si aga dongo dongo.

⁷Gi senge senge, ala honde gbanda na ndö ti du ti gbu mbi; gi senge senge, ala zi du na lege ti mbi titene mbi ti daa.

⁸Ayeke nzoni mbeni kota ye ti ngangu so ala hinga li ti ala daa pepe asi na ala. Ayeke nzoni gbanda so ala wani ahonde so agbu ala si ala wara kuâ na ya ti kota ye ti ngangu so!

⁹Tongaso fade be ti mbi ayeke si singo na ngia ndali ti KOTA GBIA; mbi yeke dodo na ngia ndali ti so lo soo mbi na kuâ awe.

¹⁰Na be ti mbi kue, fade mbi yeke tene: “KOTA GBIA, zo wa laa alingbi na mo, zo wa? Mo yeke zi zo ti mawa na maboko ti zo so ayeke na ngangu ahon lo; mo yeke zi zo ti mawa nga na wayere na maboko ti azo so ayeke nzi ala.”

¹¹Azo alondo ti bi tënë ti mvene na li ti mbi, ala hunda mbi na ndö ti ye so mbi hinga pepe.

¹²Nzoni so mbi sara, ala kiri gi sioni na mbi; fadeso mbi ngba gi mbi oko.

¹³Na ndembe so lani awato ti mbi ayeke na kobela, mbi yu bongo ti mua, mbi ke kobe, mbi sara tere ti mbi kete si mbi zia ti sambela pepe.

¹⁴Mbi sara ye so ndali ti ala tongana ti so zo ayeke sara ye ndali ti mba ti lo wala ita ti lo. Mbi zia maboko na li ti mbi na toto tongana ti so zo ayeke toto kuâ ti mama ti lo.

¹⁵Me so mbi ti awe, ala bongbi tere ti ala ti he mbi; awande, azo so mbi hinga ala pepe, ala bongbi tere ti ala ti dekongo na li ti mbi lakue.

¹⁶Azo ti mvene so, ala zia lege ti hengo mbi pepe, ala yeke te pembe ti ala na ngonzo na tere ti mbi.

¹⁷KOTA GBIA, fade mo ngba ti baa ye ni so ngbii asi lawa? Zi mbi na ya ti aye ti sioni ti azo so, gboto mbi na maboko ti abamara so.

¹⁸Fade mbi yeke mu singila na mo na ya ti kota bongbi ti azo ti mo; mbi yeke gonda mo na popo ti gba ti azo ni.

¹⁹Azo so azia be na mbi senge senge so, ayeke nzoni ala he mbi pepe; azo so ake mbi senge senge so, ayeke nzoni ala te le ti ala na peko ti mbi pepe.

²⁰Tënë ti siriri ayeke na yanga ti ala laoko pepe; ala yeke du mvene na li ti azo ti kodro so ayeke duti ti ala kpoo.

²¹Ala zi yanga ti ala kota na tere ti mbi si ala yeke tene: “Huuu! Huuu! Le ti e abaa lo awe!”

²²KOTA GBIA, mo baa ye ni awe, mo kanga yanga ti mo na ndö ni pepe! Kota Gbia, mo gue yongoro na tere ti mbi pepe!

²³Nzapa ti mbi, Kota Gbia ti mbi, mo zingo, mo londo mo fâ ngbanga ti mbi, mo gbu koko ti mbi!

²⁴KOTA GBIA, Nzapa ti mbi, na lege ti mbirimbiri ti mo, mo fâ ngbanga ti mbi. Ayeke nzoni azo ni aduti na ngia ndali ti mbi pepe!

²⁵Ayeke nzoni ala tene na be ti ala pepe, atene: “Huuu! Huuu! Ye so e ye fade laa!” Ayeke nzoni ala tene pepe: “E mene lo awe!”

²⁶Azo so tënë ti pasi ti mbi anzere na ala so, ayeke nzoni kamene agbu le ti ala. Azo so abaa tere ti ala kota ahon mbi so, ayeke nzoni kamene asara ala si nengo ti ala ati na sese.

²⁷Me ti azo so aye lani titene a fâ ngbanga ti mbi mbirimbiri, fade ala yeke dekongo na ngia; ala yeke tene lakue, atene: “KOTA GBIA ayeke kota, lo ye nzoni duti ti zo ti kua ti lo.”

²⁸Ti mbi, fade mbi yeke ngba ti tene tënë ti mbirimbiri ti mo, mbi yeke gonda mo lakue.