Read sango Abia (Psaumes) 38 Bible Online

Abia (Psaumes) 38 - sango bible

Abia (Psaumes) 38

¹Bia ti David. Bia ti dango be.

²*KOTA GBIA, mo pika mbi, me na ngonzo pepe, mo suku na mbi, me na ngonzo ti wâ pepe.

³Ale ti kokora ti mo awara mbi awe, maboko ti mo apika mbi awe.

⁴Ndali ti ngonzo ti mo, ya ti tere ti mbi kue gi na songo ni; ndali ti asiokpari ti mbi, abio ti mbi kue awoko.

⁵Biani, asioni ti mbi ahon ndö ti li ti mbi, asioni ni ane mbi ahon ndoni tongana mbeni nengo kungba.

⁶Aka ti mbi afun sioni, sanzo ayeke yuru daa; so kue ndali ti buba ti mbi.

⁷Mbi woko kue awe, ngangu ti mbi kue awe; Lakue, mbi yeke gi na vundu na be ti mbi.

⁸Biani, ya ti tere ti mbi kue amu wâ, ya ti tere ti mbi kue gi na songo ni.

⁹Ngangu ti mbi ahunzi awe, mbi woko kue awe; ndali ti pasi so ayeke na be ti mbi, mbi yeke dema.

¹⁰KOTA GBIA, ye so kue be ti mbi aye, ni laa ayeke na le ti mo so; demango tere ti mbi ahonde na le ti mo pepe.

¹¹Be ti mbi ayeke pika ngangu, ngangu ahunzi na mbi awe; le ti mbi avuko, mbi yeke baa ndo tuuu.

¹²Azo so mbi na ala e ye tere na azo so mbi na ala e yeke fono lakue, ala ga nduru na mbi pepe ndali ti aka ti mbi; a-ita ti mbi aluti yongoro na tere ti mbi.

¹³Azo so aye kuâ ti mbi, ala leke kuku ti gbu na mbi; azo so aye titene sioni ye asi na mbi, ala yeke tene tënë ti buba gigi ti mbi; lakue, ala yeke du mvene na li ti mbi.

¹⁴Ti mbi, mbi kanga mê ti mbi, mbi yeke ma ndo pepe; mbi yeke tongana buburu, mbi yeke zi yanga oko pepe.

¹⁵Mbi yeke tongana zo so ama ndo pepe, mbi yeke kiri tënë oko pepe.

¹⁶KOTA GBIA, mbi zia be ti mbi ti ku gi mo; Kota Gbia, Nzapa ti mbi, fade mo yeke kiri tënë na mbi.

¹⁷Biani, mbi hunda na mo ye so: “Tongana mbi ye ti ti, ayeke nzoni azo so ahe mbi na ngia pepe, ala gonda tere ti ala ndali ti mbi pepe.”

¹⁸Baa, mbi ga nduru ti ti awe, pasi ti mbi ayeke hunzi laoko pepe.

¹⁹Biani, mbi hinga sioni ti mbi awe si siokpari ti mbi amu mbeto na mbi.

²⁰Awato ti mbi angba na fini, ala yeke na ngangu; azo so ake mbi senge senge, ala yeke mingi.

²¹Azo so mbi sara nzoni na ala, ala yeke kiri gi sioni na mbi; ala yeke bi tënë na li ti mbi ndali ti nzoni so mbi gi lege ti sara.

²²KOTA GBIA, mo zia mbi pepe. Nzapa ti mbi, mo ngba yongoro na tere ti mbi pepe.

²³Ga hio mo mu maboko na mbi! Kota Gbia, mo yeke wasongo mbi!