Read sango Abia (Psaumes) 39 Bible Online

Abia (Psaumes) 39 - sango bible

Abia (Psaumes) 39

¹Bia ti David; bia so ayeke ndali ti makonzi-bia, nga ndali ti Yedutun.

²Mbi tene lani, mbi tene: “Fade mbi yeke bata lege ti mbi nzoni si mbi tene atënë ti sioni pepe. Fade mbi yeke zi yanga oko pepe tongana mbeni zo ti sioni ayeke luti na dawa ti mbi.”

³Mbi yeke tongana buburu, mbi tene tënë pepe; mbi kai kpoo, me ye aga nzoni na mbi pepe; pasi ti mbi akiri ahon ndoni.

⁴Ya ti be ti mbi ayeke kporo kporongo, gbungo-li ti mbi ague yongoro, ayeke gbi mbi tongana wâ; mbi ha gbaa, mbi zi yanga.

⁵*KOTA GBIA, fa na mbi lango so fini ti mbi ayeke hunzi na ni; lango ti mbi angba oke na ndö ti dunia so? Tongaso si mbi hinga, mbi tene, lango ti mbi ayeke ninga pepe.

⁶Baa, mo mu na mbi lango ti fini so ayeke nduru tongana ya ti maboko ti mbi. Na le ti mo, fini ti mbi ayeke ye oko pepe. Biani, ataa zo angba ngangu, lo yeke gi pupu senge. Luti kete

⁷Biani, zo ayeke si kâ, lo yeke si ge, me lo yeke tongana gbe ti de! Biani, aye so kue lo yeke sara ayeke gi pupu senge; lo yeke bongbi mosoro, me lo hinga zo so ayeke mu ni pepe.

⁸Fadeso, Kota Gbia, nyen laa mbi lingbi ti ku, nyen? Mbi zia be ti mbi ti ku gi mo oko.

⁹Zi mbi na ya ti asiokpari ti mbi kue; mo zia lege pepe na abuba zo ti zonga mbi.

¹⁰Mbi kai ti mbi awe, mbi yeke kiri ti tene tënë pepe, ngbanga ti so mo laa mo sara ye ni.

¹¹Mo zia ti pika mbi, mbi yeke kui na gbe ti pika ti mo.

¹²Tongana mo ye ti kiri zo na nzoni lege, mo yeke pika lo ndali ti sioni ti lo. Mo yeke buba ye so lo ye mingi tongana ti so ngusu ayeke buba ye. Biani, zo ayeke gi pupu senge! Luti kete

¹³KOTA GBIA, ma sambela ti mbi, dingi mê ti mo, mo ma toto ti mbi, mo baa ngu ti le ti mbi senge tongaso pepe. Biani, na ndo ti mo, mbi yeke tongana wande, mbi yeke ti mbi senge senge wande so aga ndali ti mbeni kete ngoi, tongana akotara ti mbi.

¹⁴Kiri mo baa mbi pepe, tongaso si mbi wara lege ti wu pupu kete kozoni si mbi gue si peko ti mbi agirisa biani biani.