Read sango Abia (Psaumes) 40 Bible Online

Abia (Psaumes) 40 - sango bible

Abia (Psaumes) 40

¹Bia ti David; bia so ayeke ndali ti makonzi-bia.

²Mbi ku *KOTA GBIA na be ti mbi kue, lo ba tere ti lo na mbage ti mbi, lo ma toto ti mbi.

³Lo gboto mbi, lo sigigi na mbi na ya ti sioni du, na ya ti potopoto so ali mingi. Lo zia mbi na nduzu, mbi luti na ndö ti kota têne, lo sara si mbi tambula mbirimbiri.

⁴Lo zia fini bia na yanga ti mbi, bia ti sepelango na Nzapa ti e. Fade azo mingi ayeke baa ye ni, ala yeke sara mbeto ti KOTA GBIA si ala yeke zia be ti ala na ndö ti lo.

⁵Ti lo nzoni, zo so azia be ti lo na ndö ti KOTA GBIA si lo mu peko ti anzapa ti mvene pepe, wala lo mu peko ti azo ti mvene pepe.

⁶KOTA GBIA, Nzapa ti mbi, mo sara akota ye na aye ti kpene mingi ndali ti e! Mbeni zo ti lingbi na mo ayeke daa pepe. Mbi ye ti tene tënë ni na azo, mbi ye ti fa tënë ni na ala; me atënë ni ayeke gbani, mbi lingbi ti tene ni kue pepe.

⁷*Sandaga wala mbeni ye so zo amu na mo, so laa mo ye pepe. Mo mu na mbi mê ti mango na ndo. Sandaga so a gbi ni kue na wâ, wala sandaga so a mu ndali ti siokpari, so laa mo hunda pepe.

⁸Nilaa mbi tene: “Baa, mbi yeke ga; na ya ti mbeti ti *Ndia, a su tënë ti ye so mbi lingbi ti sara.”

⁹Nzapa ti mbi, mbi ye ti sara ye so anzere na be ti mo; mbi bata Ndia ti mo na ya ti be ti mbi kâ.

¹⁰Na ya ti kota bongbi ti azo, mbi fa tënë ti mbirimbiri ti mo; mbi kanga yanga ti mbi pepe, KOTA GBIA, mo hinga ni kue.

¹¹Mo zi mbi awe, mbi ye ti honde tënë ni na ya ti be ti mbi pepe. Tongaso mbi tene: “KOTA GBIA ayeke bata tënë ti yanga ti lo, lo laa lo yeke soo e na kuâ.” Na ya ti kota bongbi ti azo, mbi honde tënë ti nzoni be ti mo pepe, mbi honde taa-tënë ti mo pepe.

¹²Ti mo, KOTA GBIA, mo ke ti baa mawa ti mbi pepe; fade nzoni be ti mo na taa-tënë ti mo ayeke bata mbi lakue.

¹³Biani, angba kete ka aye ti ngangu so zo alingbi ti diko ni pepe ahon ndö ti mbi. Asioni ti mbi akiri gi na li ti mbi, asara si mbi lingbi ti baa ndo nzoni pepe. Asioni ti mbi awu mingi ahon kua ti li ti mbi, be ti mbi kue awoko awe.

¹⁴KOTA GBIA, mbi gbu gere ti mo, mo zi mbi maa! KOTA GBIA, ga hio mo mu maboko na mbi!

¹⁵Azo so agi lege ti zi fini ti mbi so, ayeke nzoni kamene agbu le ti ala, ala kue legeoko. Azo so aye titene sioni asi na mbi so, ayeke nzoni ala kiri na peko, kamene na le ti ala.

¹⁶Azo so ayeke he mbi na ngia, atene: “Huuu! Huuu!” so, ayeke nzoni ala luti gozaa ndali ti kamene so agbu le ti ala.

¹⁷Me azo so kue ayeke gi mo, ayeke nzoni ala dodo na ngia ndali ti mo. Azo so aye mo, Wasongo azo na kuâ, ayeke nzoni ala ngba lakue ti tene: “KOTA GBIA ayeke kota!”

¹⁸Mbi yeke ti mbi wayere na zo ti mawa, me Kota Gbia ayeke dabe ti lo na mbi. Mo yeke mu maboko na mbi, mo yeke zi mbi na ya ti aye ti sioni. Nzapa ti mbi, mo ku pepe!