Read sango Abia (Psaumes) 41 Bible Online

Abia (Psaumes) 41 - sango bible

Abia (Psaumes) 41

¹Bia ti David; bia so ayeke ndali ti makonzi-bia.

²Ti lo nzoni, zo so adabe ti lo na zo so ngangu atia lo! Na lango so ye ti sioni asi na zo ni, *KOTA GBIA ayeke zi lo na ya ni.

³KOTA GBIA ayeke bata lo na fini si lo yeke duti nzoni na ndö ti sese so. KOTA GBIA ayeke zia lo ti ti na maboko ti awato ti lo pepe, awato ti lo so ayeke na nzara ti sara sioni na lo so.

⁴KOTA GBIA ayeke mu maboko na lo na ndembe so lo yeke na kobela na ndö ti gbogbo; KOTA GBIA ayeke leke gbogbo ti lo na ndembe so lo yeke na kobela.

⁵Ti mbi, mbi tene: “KOTA GBIA, baa mawa ti mbi, kai kobela ti mbi; biani mbi sara siokpari so ake mo.”

⁶Awato ti mbi ayeke tene sioni tënë na tere ti mbi, ala tene: “Lawa laa lo yeke kui si fade iri ti lo ayeke mingo biani biani so?”

⁷Tongana mbeni oko ti ala aga ti baa mbi, lo yeke na asioni tënë na be ti lo na tere ti mbi; asioni tënë so azo ayeke tene na tere ti mbi, lo yeke bata ni na be ti lo. Gi so lo sigigi awe, lo yeke vunga ni na ndo kue.

⁸Azo so ake mbi abongbi ti ngbokoro mbi; ala yeke gbu li ti ala na ndö ti sioni so asi na mbi.

⁹Ala yeke tene: “Lo wara sioni kobela awe! So lo lango na gbogbo awe so, lo yeke kiri ti londo pepe!”

¹⁰Ataa mba ti mbi so mbi na lo, e ye tere mingi, lo so mbi zia be ti mbi na ndö ti lo, so mbi na lo, e yeke te ka kobe oko, lo nga, lo ga wato ti mbi.

¹¹Me mo, KOTA GBIA, baa mawa ti mbi, yo mbi na nduzu, tongaso si mbi kiri na ala peko ti sioni so ala sara na mbi.

¹²Ye so mbi yeke hinga, mbi tene, mo ye mbi mingi ayeke so: alingbi wato ti mbi adekongo ti songo benda na ndö ti mbi pepe.

¹³Mo gbu mbi awe, mbi ngba na nduzu, mo mu na mbi nzoni tere awe; mo sara si mbi ngba na dawa ti mo kpu na kpu.

¹⁴Singila na KOTA GBIA, Nzapa ti Israel; ngbene ye kpu na kpu, lakue lakue! Amen! Amen!