Read sango Abia (Psaumes) 45 Bible Online

Abia (Psaumes) 45 - sango bible

Abia (Psaumes) 45

¹Bia ti azo ti Kore; bia so ayeke ndali ti makonzi-bia. A he ni na kundi. Bia ti fango ye na zo; bia ti yengo tere.

²Be ti mbi asi singo na anzoni tënë ti tenengo ni; mbi yeke he nzoni bia ti mbi na gbia. Ayeke nzoni yanga ti mbi ayapu na bia ni tongana keke ti mbeti ti zo so ahinga ti su mbeti nzoni.

³Mo yeke pendere mo hon akoli kue, mo yeke tene tënë pendere mingi. Ndani laa Nzapa asara tufa na ndö ti mo kpu na kpu.

⁴Mo, ngangu zo ti bira, kanga yongoro zeme ti mo na ngbonda ti mo; so laa afa gonda ti mo na nengo ti mo ti gbia.

⁵Ti fa nengo ti mo ti gbia, mo ko na ndö ti mbarata, mo gue, mo tiri bira ndali ti taa-tënë, ndali ti fango ngbanga ti mbirimbiri. Na lege ti ngangu ti maboko ti mo, mo sara aye ti ziango mbeto na be ti azo!

⁶Yanga ti ale ti kokora ti mo aza mingi, fade ayeke koro be ti awato ti mo, gbia. Biani, fade azo kue ayeke ti na gbe ti mo.

⁷Gbia, mbata ti mo ti gbia ayeke tongana ti Nzapa, ayeke ngba lakue lakue. Na ya ti kodro-gbia ti mo, mo yeke sara komandema na legeni.

⁸Mo ye sarango ye ti mbirimbiri, mo ke sarango ye ti sioni. Ndani laa, Nzapa, Nzapa ti mo asoro mo na popo ti amba ti mo kue ti ga gbia si lo tuku mafuta ti matanga na li ti mo.

⁹Abongo ti mo ayeke fun gi yombo ti mire, ti aloes na ti kanele. Kâ na yangbo ti mo so a leke na pembe ti doli, azo ayeke pika mozoko ti zia ngia na be ti mo.

¹⁰Amolenge-wali ti gbia ayeke kâ, ala yu aye ti pendere ti mo. Na mbage ti maboko ti mo ti koli, wali ti gbia aluti; lo yu aye ti pendere so ayeke na lôro ti nzoni ni.

¹¹Molenge ti mbi ti wali, ma si! Baa ndo, dingi mê ti mo, mo ma. Ayeke nzoni be ti mo agirisa na azo ti kodro ti mo nga na asewa ti mo.

¹²Ayeke nzoni gbia asara nzara ti pendere ti mo; fadeso lo laa lo yeke gbia ti mo, ayeke nzoni mo kuku na gbe ti lo.

¹³Azo ti gbata ti Tir, ala so ayeke na mosoro mingi, fade ala yeke ga na mo akadoo titene be ti mo anzere na ala.

¹⁴Molenge-wali ti gbia ayeke li na ya ti da; nengo ti wali ti gbia, lo yu apendere bongo so a zia lôro na tere ni.

¹⁵Gba ti anzoroko ayeke na tere ti bongo ti lo; a mu lo ti gue na lo na tere ti gbia. Ambeni mba ti lo amaseka-wali amu peko ti lo; a yeke gue na ala na mo.

¹⁶Na dekongo na ngia, ala yeke li na yangbo ti gbia.

¹⁷Gbia, amolenge ti mo ayeke duti ande na ndö ti mbata ti akotara ti mo; mo yeke sara si ala ga amakonzi na ndö ti sese kue.

¹⁸Ti mbi, mbi yeke sara si azo ti ngoi kue angba ti dabe ti ala na iri ti mo. Tongaso, fade amara ayeke sepela mo kpu na kpu.