Read sango Abia (Psaumes) 46 Bible Online

Abia (Psaumes) 46 - sango bible

Abia (Psaumes) 46

¹Bia ti azo ti Kore; bia so ayeke ndali ti makonzi-bia. A he ni na aye ti mozoko so atoto na nduzu

²Nzapa ayeke ndo so e kpe daa ti bata tere ti e, lo yeke ngangu ti e. Lo yeke lakue nduru ti mu maboko na e na ngoi ti ye ti ngangu.

³Ndani laa, mbeto ayeke sara e oko pepe, ataa sese ayingi na ndo kue, ataa ahoto alondo ati na be ti kota ngu-ingo,

⁴ataa *amapo ti kota ngu-ingo atoto, asuku, ataa ngangu ti angu ni ayingi akota hoto. Luti kete

⁵Me mbeni kota ngu ayeke daa so ayeke sua si ayeke zia ngia na be ti azo ti gbata ti Nzapa, gbata ni ayeke nde si ayeke nzoni kue; gbata ni ayeke ndo so Nzapa aduti daa, Nzapa so ayeke na yayu kâ na ndö ti aye kue.

⁶Nzapa ayeke na ya ti gbata ni; mbeni ye alingbi ti kinda ni oko pepe. Na ndaperere, kozoni si lâ asigigi, Nzapa ayeke ga ti mu maboko na azo ti gbata ni.

⁷Amara asara wusuwusu, akodro ti agbia ayingi; Nzapa atene tënë na kota go si sese aga tongana ngu.

⁸KOTA GBIA so ayeke na ndö ti dunia kue ayeke na e; Nzapa ti Jacob ayeke tongana ngangu gbagba na tere ti e. Luti kete

⁹Ala azo, ala ga abaa ye so KOTA GBIA asara; aye so lo buba na ndö ti sese!

¹⁰Lo kai abira ngbii asi na nda ti sese kue; lo fâ ya ti akokora, lo kungbi ya ti alikongo, lo gbi apusu ti mbarata ti bira.

¹¹KOTA GBIA adekongo, atene: “Ala zia bira! Ayeke nzoni ala hinga so mbi yeke Nzapa! Mbi hon ndö ti amara kue, mbi hon ndö ti azo ti dunia kue.”

¹²KOTA GBIA, lo so lo yeke na ndö ti dunia kue ayeke na e. Nzapa ti Jacob ayeke tongana ngangu gbagba na tere ti e. Luti kete