Read sango Abia (Psaumes) 48 Bible Online

Abia (Psaumes) 48 - sango bible

Abia (Psaumes) 48

¹Bia ti azo ti Kore.

²*KOTA GBIA ayeke kota, azo ayeke gonda Nzapa ti e mingi; ala yeke gonda lo na ya ti gbata ti lo, na ndö ti hoto ti lo so ayeke nde si ayeke nzoni kue.

³Hoto ni ayeke pendere mingi si ayeke zia ngia na be ti azo ti sese kue. Hoto ni ayeke hoto ti *Sion, taa hoto ti Nzapa; Sion ayeke gbata ti kota Gbia.

⁴Na ya ti yangbo ti gbata ti Sion, azo ahinga atene, Nzapa ayeke tongana ngangu gbagba na tere ti azo ti lo.

⁵Baa, agbia abongbi tere ti ala awe, ala londo legeoko ti ga na bira na tere ti Sion.

⁶Gi so ala baa KOTA GBIA awe, be ti ala ado, mbeto agbu ala ahon ndoni si ala kpe kirikiri.

⁷Biaku, tere ti ala ato nda ti do si ala ngba gi na ndo oko tongana wali so aga nduru ti du.

⁸Ye ni akpa pupu ti mbage ti To so aya si akungbi ya ti akota mangboko na le ti kota ngu-ingo.

⁹Ye so e ma tënë ni na me ti e so, e baa ni na le ti e wani awe na ya ti gbata ti KOTA GBIA, lo so lo yeke na ndö ti dunia kue, na ya ti gbata ti Nzapa ti e. Nzapa ayeke sara si gbata ni akpengba, angba kpu na kpu. Luti kete

¹⁰Nzapa, so e yeke na ya ti kota da ti mo, e yeke dabe ti e na nzoni be ti mo.

¹¹Nzapa, azo ayeke gonda mo ngbii asi na nda ti sese kue, ala hinga mo ngbii asi na nda ti sese kue. Maboko ti mo ti koli asi singo na sarango ye ti mbirimbiri.

¹²Na ndö ti hoto ti Sion, azo ayeke na ngia, na ya ti agbata ti Juda, azo ayeke dodo na ngia ndali ti fango ngbanga ti mo.

¹³Azo, ala tambula angoro gbagba ti Sion; ala diko akota da so ayo na nduzu, ada so asanziri ayeke duti daa.

¹⁴Ala baa lege so agbagba ti gbata ni apendere, ala diko ayangbo ti ya ni si fade ala tene tënë ni na amolenge ti ala so ayeke ga ande na peko ti ala; fade ala tene:

¹⁵“Nzapa so laa ayeke Nzapa ti e kpu na kpu; lo yeke ngba ti fa na e lege lakue lakue.”