Read sango Abia (Psaumes) 51 Bible Online

Abia (Psaumes) 51 - sango bible

Abia (Psaumes) 51

¹Bia so ayeke ndali ti makonzi-bia; bia ti David.

²David adema tere ti lo na peko ti so wayanga-Nzapa Natan aga asuku na lo ndali ti so lo gi Batsheba, wali ti mba ti lo.

³O Nzapa, mo so mo yeke sara nzoni be na zo, baa mawa ti mbi! O Nzapa, mbi buba lege ti ndia ti mo awe! Na lege ti kota nzoni be ti mo, zi sioni ni na li ti mbi.

⁴Sukula asioni ti mbi kue; zi siokpari ti mbi si mbi ga *nzoni.

⁵Mbi hinga so mbi buba lege ti ndia ti mo awe; siokpari ti mbi ayeke lakue na le ti mbi.

⁶Mbi sara siokpari so ake mo, ake gi mo oko; mbi sara ye so ayeke sioni na le ti mo. Tongaso, fade azo ayeke baa so mo yeke mbirimbiri na lege ti tënë ti yanga ti mo; fade ala yeke baa so fango ngbanga ti mo ayeke na legeni.

⁷Baa, a du mbi na ya ti siokpari; gi so mbi de na ya ti mama ti mbi, mbi yeke zo ti sarango sioni.

⁸Me ye so anzere na be ti mo ayeke titene taa-tënë aduti na be ti mbi. Na be ti mbi kâ, mo yeke fa na mbi lege ti ndara.

⁹Mu kete keke ti *izope, mo zi na siokpari ti mbi si mbi ga *nzoni; sukula mbi si mbi vuru tarara.

¹⁰Sara si mbi ma atënë ti ngia si tere ti mbi anzere. Tongaso si mbi so mo kungbi mbi awe, mbi londo ti dodo.

¹¹Kiri mo baa siokpari ti mbi pepe; zi asioni ti mbi kue.

¹²O Nzapa, mu na mbi be so avuru tarara; sara si mbi ga fini zo si mbi ngba lakue gi na lege ti mo.

¹³Mo tumba mbi yongoro na le ti mo pepe; Yingo-Vuru ti mo so ayeke na mbi so, mo zi ni pepe.

¹⁴Sara si mbi kiri mbi duti na ngia ndali ti so mo soo mbi awe; sara si Yingo ti mo amu na mbi ngangu; Yingo ti mo so ayeke sara nzoni ye na zo.

¹⁵Fade mbi yeke fa lege ti mo na azo so ake ndia ti mo si azo ti sarango siokpari ayeke kiri na mbage ti mo.

¹⁶O Nzapa, wasongo mbi, zi ngbanga ti mene na li ti mbi; ngbanga ti mene so mbi tuku so. Fade mbi yeke he bia na ngia ti fa ye ti mbirimbiri so mo sara na mbi.

¹⁷Kota Gbia, zi yanga ti mbi si fade mbi he bia ti gonda mo.

¹⁸Mo ye *sandaga pepe. Tongana mo ye fade sandaga ti anyama so a gbi ni kue na wâ, ka mbi mu ni na mo awe; me so laa anzere na be ti mo pepe.

¹⁹Sandaga so Nzapa aye tënë ni ayeke be so afâ. Zo so asara tere ti lo kete si be ti lo aso ndali ti sioni so lo sara, mo Nzapa, mo yeke ke lo pepe.

²⁰Tongana anzere na be ti mo, sara nzoni na gbata ti *Sion; kiri mo leke gbagba ti gbata ti Jérusalem.

²¹Tongaso, fade be ti mo ayeke nzere na asandaga so azo amu ni alingbi na tënë ti ndia. Tongaso, fade be ti mo ayeke nzere na asandaga so a yeke gbi ni kue na wâ na aye so kue azo amu na mo. Tongaso, fade azo ayeke mu akoli-bagara na sandaga na ndö ti gbalaka ti mo.