Read sango Abia (Psaumes) 55 Bible Online

Abia (Psaumes) 55 - sango bible

Abia (Psaumes) 55

¹Bia so ayeke ndali ti makonzi-bia. A he ni na kundi. Bia ti fango ye na zo; bia ti David.

²Nzapa, dingi mê ti mo, mo ma sambela ti mbi; tongana mbi dema tere ti mbi na mo, mo honde tere ti mo pepe.

³Mo ma mbi, mo kiri tënë na mbi. Li ti mbi akpe, mbi yeke dema si mbi yeke tene tënë kirikiri

⁴ndali ti so wato ti mbi adekongo na li ti mbi, azo ti sioni ayeke sara ngangu na mbi; ala sara si aye ti sioni aga na ndö ti mbi gbani gbani; na lege ti ngonzo, ala yeke sara pasi na mbi.

⁵Be ti mbi ayeke do mingi na ya ni kâ; mbeto ti kuâ agbu mbi.

⁶Mbeto asara mbi mingi, tere ti mbi ayeke do; mbeto ahon ndö ti mbi.

⁷Nilaa mbi tene: “Tongana *kpangi ti mbi ayeke fade daa tongana ti mbipa, ka mbi huru ti wara mbeni ndo ti wu tere ti mbi daa.

⁸Ka mbi kpe yongoro, mbi gue, mbi duti na benyama. Luti kete

⁹Ka mbi wara ndo hio ti honde tere ti mbi daa ndali ti kota pupu so ayeke ya ngangu.”

¹⁰*Kota Gbia, buba ya ti yanga ti kodro ti ala si ala kiri ama tere pepe, kangbi ya ti ala! Biani, na ya ti gbata ni, mbi baa gi aye ti ngangu na tiri.

¹¹Bi na lâ, aye ti ngangu na tiri ni ayeke fono na tere ti gbagba ni. Gi ye ti sioni na ye ti kirikiri laa ayeke na ya ti gbata ni.

¹²Na ya ti gbata ni, gi bubango ye; sarango ngangu nga na handango zo angba na ndö ti alege.

¹³Tongana fade wato laa ayeke zonga mbi, ka mbi kanga be ti mbi. Tongana fade zo so be ti lo ake mbi laa aye ti sara sioni na mbi, ka mbi honde tere ti mbi.

¹⁴Me mo laa mo sara ye so, mo so mo yeke zo tongana mbi, mo so mo yeke mba ti mbi, mo so mbi na mo, e ye tere mingi!

¹⁵Mbi na mo, e yeke tene tënë ti be ti e lani na popo ti e, e yeke tambula legeoko ti gue na kota da ti Nzapa.

¹⁶Ayeke nzoni kuâ amu awato ti mbi. So ala de na fini so, ayeke nzoni ala gue na ndo ti akuâ, ngbanga ti so sioni ye asi singo na be ti ala.

¹⁷Ti mbi, mbi dekongo na Nzapa, fade KOTA GBIA ayeke soo mbi.

¹⁸Na ndaperere, na bekombite, na lakui, mbi yeke dema, mbi yeke toto tere ti mbi si lo yeke ma go ti mbi.

¹⁹Lo zi mbi si lo mu na mbi siriri; lo bata mbi na ya ti bira so awato ayeke tiri na mbi; awato ti mbi so ayeke gbani gbani.

²⁰Ayeke nzoni Nzapa ama mbi, lo zia kamene na le ti ala; lo so lo duti gbia ngbene ye so dunia abaa gigi! Luti kete Azo ni ayeke sanze sarango ye ti ala pepe, ala yeke kpe mbeto ti Nzapa pepe.

²¹Zo so asara sioni na amba ti lo awe, amba ti lo so lo na ala aduti na siriri; lo buba ya ti *mbuki ti lo awe.

²²Tënë ti yanga ti lo anzere tongana mafuta ti wotoro, me tënë ti bira ayeke na be ti lo kâ. Atënë ti yanga ti lo ayeke woko zo ahon mafuta, me atënë ni ayeke kpo zo tongana zeme.

²³Zi akungba ti be ti mo, mo zia na ndö ti KOTA GBIA, fade lo yeke mu na mo aye so kue atia mo. Lo yeke zia zo ti mbirimbiri titene mbeni ye ayingi lo pepe.

²⁴Fade mo Nzapa, mo yeke bi azo ni so na ya ti du ti kuâ so yanga ni azi kota. Ti azo ti tukungo mene na azo ti handango zo, ala yeke si na ndambo ti lango ti fini ti ala pepe. Ti mbi, mbi zia be ti mbi na ndö ti mo.