Read sango Abia (Psaumes) 57 Bible Online

Abia (Psaumes) 57 - sango bible

Abia (Psaumes) 57

¹Bia so ayeke ndali ti makonzi-bia. A he ni na go ti bia so iri ni: “Mo buba ye pepe.” Sambela ti ya ti be ti David. Lo he ni na ndembe so Saul atumba peko ti lo si lo kpe, lo honde tere ti lo na ya ti du ti têne.

²Nzapa, baa mawa ti mbi, baa mawa ti mbi! Biani, mbi kpe ti honde tere ti mbi na mbage ti mo; mbi yeke honde tere ti mbi na gbe ti *kpangi ti mo ngbii aye ti ngangu ahon si.

³Mbi dekongo na Nzapa, lo so lo yeke na yayu kâ na ndö ti aye kue; mbi dekongo na Nzapa, lo yeke sara ande ye kue ndali ti mbi.

⁴Kâ na yayu, ayeke nzoni lo yeke tokua ye ti songo mbi na kuâ. Biani, zo ti tumbango peko ti mbi ayeke zonga mbi. Luti kete Ayeke nzoni Nzapa afa na mbi so lo yeke sara nzoni be na mbi si lo yeke bata tënë ti yanga ti lo.

⁵Mbi yeke na popo ti azo so ayeke tongana abamara so ayeke te zo; pembe ti azo ni ayeke tongana likongo na kokora; menga ti ala ayeke tongana yongoro zeme so yanga ni aza mingi.

⁶Nzapa, ayeke nzoni mo fa so mo yeke kota, mo hon ayayu kue; ayeke nzoni gonda ti mo asu amu ndö ti sese kue!

⁷Azo azia gbanda na lege ti mbi, angba kete ka mbi ti na ya ni. Ala zi du na lege ti mbi, me ala wani ati na ya ni. Luti kete

⁸Nzapa ti mbi, mbi leke be ti mbi awe, mbi leke be ti mbi awe; mbi yeke he bia, mbi yeke pika mozoko na mo.

⁹Be ti mbi, mo zingo na lango si; kota kundi na kete kundi, ala zingo na lango si! Mbi yeke sara si lumiere ti ndaperere azingo na lango.

¹⁰Kota Gbia, fade mbi yeke mu singila na mo na popo ti azo; mbi yeke he bia ti gonda na mo na popo ti amara nde,

¹¹ngbanga ti so nzoni be ti mo ague ngbii asi na yayu, batango tënë ti yanga ti mo so mo yeke bata ague ngbii asi na ambinda.

¹²Nzapa, ayeke nzoni mo fa so mo yeke kota, mo hon ayayu kue; ayeke nzoni gonda ti mo asu amu ndö ti sese kue!