Read sango Abia (Psaumes) 58 Bible Online

Abia (Psaumes) 58 - sango bible

Abia (Psaumes) 58

¹Bia so ayeke ndali ti makonzi-bia. A he ni na go ti bia so iri ni: “Mo buba ye pepe.” Sambela ti ya ti be ti David.

²Ala akota zo, fango ngbanga so ala yeke fâ so, ala fâ ni mbirimbiri laa? Fango ngbanga so ala yeke fâ so, ala fâ biani na legeni laa?

³Oko pepe! Taa na be ti ala, ala yeke fâ ngbanga ti sioni ni; na ndö ti sese, ala sara si sarango ngangu na azo amu ndo kue.

⁴Gi so azo ti sioni ade na ya ti mama ti ala, ala yeke azo ti ngangu li; gi na lango so a du ala, ala yeke azo ti mvene, ala girisa lege.

⁵Tënë ti yanga ti ala ayeke sioni tongana ngu ti yanga ti ngbo; ala kanga mê ti ala tongana sioni ngbo so akanga mê ti lo,

⁶lo ma go ti azo ti handango lo pepe, ataa mbeni ngangu zo ti handango ngbo ayeke daa, ngbo ni ayeke ma go ti lo pepe.

⁷Nzapa, fâ apembe ti azo so na yanga ti ala; *KOTA GBIA, kungbi abio ti ngbangba ti abamara so!

⁸Ayeke nzoni ala hon tongana ngu so asua ahon. Ayeke nzoni Nzapa atokua ale ti kokora ti lo si ngangu ti ala kue ahunzi.

⁹Ayeke nzoni ala ga tongana ngonzâ so akui si azia dongo ti tere ti lo na sese. Ayeke nzoni ala ga tongana akete molenge so a du ala na kuâ ni si ala baa lâ pepe.

¹⁰Kozo titene akeke ti ki agbi na gbe ti ta ti ala, ataa akeke ni angba fini wala ahole, fade ngonzo ti Nzapa ayeke mu ala hio ti hon na ala.

¹¹Fade tere ti zo ti mbirimbiri ayeke nzere tongana lo baa a kiri na azo ti sioni peko ti sioni ti ala; fade lo yeke tambula na ya ti mene ti ala.

¹²Fade azo ayeke tene: “Biani, zo ti mbirimbiri awara nzoni ye ti peko ti sarango ye ti lo awe. Biani, na ndö ti sese, Nzapa ayeke daa so ayeke fâ ngbanga.”