Read sango Abia (Psaumes) 59 Bible Online

Abia (Psaumes) 59 - sango bible

Abia (Psaumes) 59

¹Bia so ayeke ndali ti makonzi-bia. A he ni na go ti bia so iri ni: “Mo buba ye pepe.” Sambela ti ya ti be ti David. Lo he ni na ndembe so Saul atokua azo ti baa da ti David si ala lingbi ti fâ lo.

²Nzapa ti mbi, zi mbi na maboko ti awato ti mbi; bata mbi si azo so alondo ti tiri na mbi agbu mbi pepe.

³Zi mbi na maboko ti azo ti sarango sioni; soo mbi na maboko ti azo ti tukungo mene.

⁴*KOTA GBIA, baa, ala honde tere ti ala ti fâ mbi; azo ti ngangu abongbi tere ti ala ti tiri na mbi, ataa so mbi sara sioni wala siokpari pepe.

⁵Mbi sara sioni oko pepe, me ala kpe hio, ala leke tere ti ala ti tiri na mbi. Zingo na lango! Ga na mbage ti mbi, mo baa ye si!

⁶Mo KOTA GBIA, Nzapa so ayeke na ndö ti dunia kue, Nzapa ti Israel, londo, mo pika amara nde so kue; azo ti kango amba ti ala so kue, baa mawa ti ala pepe. Luti kete

⁷Na lakui, ala kiri aga, ala yeke dekongo tongana ambo; ala yeke tambula, ala ngoro gbata ni.

⁸Ala diko sioni tënë ngbii yanga ti ala asi singo na *furu; atënë ti yanga ti ala ayeke kpo zo tongana yongoro zeme. Ala yeke tene: “Zo wa laa alingbi ti ma e, zo wa?”

⁹Me mo KOTA GBIA, mo yeke he ala hengo; amara nde so kue, mo yeke he ala na ngia.

¹⁰Mo so mo yeke ngangu ti mbi, mbi yeke zia be ti mbi gi na ndö ti mo. Biani, Nzapa laa ayeke ngangu gbagba na tere ti mbi.

¹¹Nzapa ti mbi, ndali ti nzoni be ti mo, mo yeke ga na mbage ti mbi. Nzapa ayeke sara si mbi baa tingo ti awato ti mbi.

¹²Me mo fâ ala pepe, tongaso pepe be ti azo ti mbi ayeke girisa na tënë ni. Kota Gbia, mo so mo yeke *vala ti e, ayeke nzoni ngangu ti mo ayingi ala, abi ala na sese.

¹³Gi so ala zi yanga ti tene tënë, ala sara siokpari na lege ti tënë ti ala. Ayeke nzoni baba ti ala aga mbeni kuku ti gbu ala, ngbanga ti so ala yeke deba azo si ala yeke tene gi mvene.

¹⁴Na ya ti ngonzo ti mo, fâ ala kue, fâ ala kue si mbeni zo oko akiri angba pepe! Tongaso si fade azo ahinga atene, Nzapa ayeke sara komandema na Israel, lo yeke sara komandema ngbii asi na nda ti sese kue. Luti kete

¹⁵Na lakui, ala kiri aga, ala yeke dekongo tongana ambo; ala yeke tambula, ala ngoro gbata ni.

¹⁶Ala yeke hon mbage na mbage ti gi kobe ti tengo ni. Tongana ala wara ni alingbi na ala pepe, ala yeke fono na bi ni kue.

¹⁷Ti mbi, fade mbi yeke he bia ti fa ngangu ti mo; na ndaperere, mbi yeke he bia na kota go ndali ti nzoni be ti mo, ngbanga ti so mo yeke ngangu gbagba na tere ti mbi; mo yeke ndo so mbi kpe daa ti bata tere ti mbi na ndembe so mbi yeke na ya ti ye ti ngangu.

¹⁸Mo so mo yeke ngangu ti mbi, mbi yeke he bia na mo. Biani, Nzapa, mo laa mo yeke ngangu gbagba na tere ti mbi, mo yeke Nzapa so mo sara nzoni be na mbi.