Read sango Abia (Psaumes) 60 Bible Online

Abia (Psaumes) 60 - sango bible

Abia (Psaumes) 60

¹Bia so ayeke ndali ti makonzi-bia. A he ni na kundi. Sambela ti ya ti be ti David. Bia ti fango ye na zo.

²Tënë ti ya ti bia ni ayeke tene tënë ti bira so David atiri na azo ti Sirii ti sese ti Mezopotamii nga na azo ti Sirii ti sese ti Soba. Na kiringo ti aturugu ti David, Yoab afâ aturugu ti sese ti Edom saki baleoko na use, na popo-hoto ti Ingo.

³O Nzapa, mo ke e awe, mo sara si e kangbi kirikiri. Mo sara ngonzo awe: kiri ngangu na e maa!

⁴Mo sara si sese ayingi; mo sara si ya ni asuru; kanga ndo so sese ni asuru daa so, ngbanga ti so sese ni aye ti ti!

⁵Mo sara si aye ti ngangu mingi asi na azo ti mo; mo mu na e vin so aso, ayeke sule zo si e nyon.

⁶Ti azo so ayeke kpe mbeto ti mo, mo fa na ala mbeni ye titene ala baa ni si ala kpe na dawa ti azo ti pikango kokora. Luti kete

⁷Na lege ti ngangu ti mo, zi e, kiri tënë na e; tongaso si e azo ti mo so mo ye e mingi, fade e soo kuâ.

⁸Na ya ti kota da ti lo so ayeke nde si ayeke nzoni kue, Nzapa atene tënë, lo tene: “Mbi so benda awe! Mbi yeke kangbi gbata ti Sishem na azo; mbi yeke haka popo-hoto ti Sukot ti mu na azo.

⁹Galaad ayeke ti mbi; Manase ayeke ti mbi. Mbi mu Efraim titene aga kpoto ti wen na li ti mbi; mbi mu Juda titene aga keke ti komandema ti mbi.

¹⁰Moab ayeke tongana kota sembe so mbi yeke sukula ngu na ya ni; mbi bi poro ti gere ti mbi na ndö ti Edom ti fa so sese ni aga ti mbi biani awe. Azo ti Filistii, ala baa ti ala atene, fade ala yeke dekongo ti songo benda na ndö ti mbi?”

¹¹Zo wa laa ayeke gue na mbi na gbata so gbagba ti bira ayeke na tere ni zo wa? Zo wa laa ayeke fa na mbi lege ti si na Edom, zo wa?

¹²Gi mo oko Nzapa laa, mo so mo ke e awe so, mo so mo ke ti gue na aturugu ti e na bira so, mo laa mo lingbi fade ti sara ni.

¹³Mu na e maboko, zi e na maboko ti awato ti e, ngbanga ti so maboko so zo ayeke mu na mba ti lo ayeke ye oko pepe.

¹⁴Na Nzapa, fade e yeke sara akota ye: lo laa lo yeke do awato ti e na gere.