Read sango Abia (Psaumes) 64 Bible Online

Abia (Psaumes) 64 - sango bible

Abia (Psaumes) 64

¹Bia so ayeke ndali ti makonzi-bia; bia ti David.

²Nzapa, ma mbi tongana mbi toto na mo; bata fini ti mbi na maboko ti wato ti mbi so ayeke zia mbeto na be ti mbi so.

³Honde mbi si ye so azo ti sioni aleke na tere ti mbi asi na mbi pepe; honde mbi si ye so azo ti sarango sioni ama tere ti sara na mbi awara mbi pepe.

⁴Menga ti ala aza tongana yongoro zeme, atënë ti yanga ti ala ayeke tongana sioni yoro, atënë ni ayeke kpo zo tongana ale ti kokora.

⁵Ala honde tere ti ala ti pika ale ti kokora ni na ndö ti zo so alingbi kue; gi hio tongaso, ala pika ale ti kokora ni, mbeto asara ala oko pepe.

⁶Ala yeke mu ngangu na be ti amba ti ala ti sara sioni, ala yeke tene tënë ti kuku so ala ye ti zia na hondengo ni, ala tene: “Zo wa laa ayeke baa ni, zo wa?”

⁷Ala yeke gbu li ti ala ti sarango asioni ye, ala tene: “E wara taa lege ni awe. Zo alingbi ti hinga tënë so ayeke na be ti mba ti lo pepe!”

⁸Me Nzapa atokua ale ti kokora ti lo na ndö ti ala; gi hio tongaso, ale ti kokora ni akpo ala.

⁹Tënë ti yanga ti ala akiri na ndö ti ala wani. Azo so kue abaa ala, ayeke yingi li ti ala.

¹⁰Mbeto agbu azo kue; ala yeke tene tënë ti ye so Nzapa asara si ala yeke ma ya ni.

¹¹Ayeke nzoni zo ti mbirimbiri aduti na ngia ndali ti *KOTA GBIA, lo kpe na KOTA GBIA ti bata tere ti lo; fade azo so kue be ti ala avuru ayeke gonda tere ti ala.