Read sango Abia (Psaumes) 65 Bible Online

Abia (Psaumes) 65 - sango bible

Abia (Psaumes) 65

¹Bia so ayeke ndali ti makonzi-bia; bia ti David. Bia.

²Nzapa, mo so mo yeke na gbata ti Sion, mo lingbi titene azo kue agonda mo; zendo so azo amu na mo, ayeke nzoni ala sara ye alingbi na ni.

³Mo so mo yeke ma sambela, fade azo kue ayeke ga nduru na mo.

⁴Nengo ti asioni ti mbi ahon ndö ti mbi awe; me mo laa mo yeke zi asiokpari ti e na li ti e.

⁵Ti lo nzoni, zo so mo soro lo si mo sara titene lo ga nduru na mo, fade lo yeke duti na ya ti gbagba ti mo. Fade e yeke wara anzoni ye ti kota da ti mo, anzoni ye ti kota da ti mo so ayeke nde si ayeke nzoni kue so.

⁶Nzapa, Wasongo e, mo so mo yeke bata tënë ti yanga ti mo, mo yeke kiri tënë na e na lege ti aye ti dongo be so mo sara. Azo ti dunia kue, ngbii asi na ala so ayeke yongoro kâ na yanga ti akota ngu-ingo, ala zia be ti ala na ndö ti mo.

⁷Na lege ti ngangu ti mo, mo sara si ahoto aluti mbirimbiri, mo kanga ngangu na tere ti mo tongana kazaka ti wen.

⁸Mo yeke kai toto ti akota ngu-ingo, mo yeke kai toto ti *amapo ti ala nga na wusuwusu ti azo.

⁹Azo so ayeke na nda ti sese kue, fade ala yeke sara mbeto ti mo ndali ti aye ti kpene so mo yeke sara. Na mbage ti To, na mbage ti Do, mo sara si azo adekongo na ngia.

¹⁰Mo ga ti sara nzoni na sese, mo tuku gba ti ngu na ndö ni, mo mu na sese gba ti mosoro. Bale ti Nzapa asi singo na ngu, mo leke le ti kobe ndali ti azo, mo leke sese tongaso:

¹¹mo tuku ngu na ndö ti sese so a leke titene a lu akobe daa; asese so angba ngbongboro ni, mo de ya ni si aga fuku fuku, mo sara si ngu apika si awoko sese ni. Mo sara tufa na ndö ti kobe so asigigi na ya ti sese ni.

¹²Na hunzingo ti ngu oko oko, mo sara si e wara anzoni ye ahon ndoni; ndo so kue mo yeke hon daa, anzoni ye ayeke sua suango daa.

¹³Ando so anyama ayeke te pere daa na benyama asi singo na anzoni ye ni, mo sara si akete hoto asi singo na ngia.

¹⁴Ngonda so gba ti apere ayeke daa, ataba na angasa asi singo daa, ale ti kobe asi singo na popo-hoto: azo kue ayeke he bia, ala yeke dodo na ngia.