Read sango Abia (Psaumes) 66 Bible Online

Abia (Psaumes) 66 - sango bible

Abia (Psaumes) 66

¹Bia so ayeke ndali ti makonzi-bia. Bia. Azo ti sese kue, ala dekongo na ngia na Nzapa!

²Ala he bia ti gonda na iri ti lo, ala gonda lo na lege ti sepelango lo.

³Ala tene na Nzapa, atene: “Aye so mo sara ayeke zia mbeto na be ti zo! Ndali ti kota ngangu ti mo, awato ti mo ayeke woko tere ti ala na gbe ti mo.

⁴Azo ti sese kue ayeke kuku na gbe ti mo, ala yeke he bia na mo, ala yeke he bia ndali ti iri ti mo.” Luti kete

⁵Ala ga abaa aye so Nzapa asara! Akota ye so lo sara ayeke zia mbeto na be ti azo.

⁶Lo sara si kota ngu-ingo aga kuru sese, azo afâ *bale ni na gere. Na ndo so laa e yeke sara ngia ndali ti lo.

⁷Na lege ti ngangu ti lo, lo yeke sara komandema kpu na kpu, le ti lo ayeke baa ndo na ndö ti amara nde. Ayeke nzoni azo ti ngangu li apika kate ti ala pepe! Luti kete.

⁸Ala azo, ala mu singila na Nzapa ti e, ala sara si azo ama tënë ti sepelango lo!

⁹Lo so lo sara si e ngba na fini, lo sara si e pika gere ti e ti ti pepe.

¹⁰Nzapa, mo tara e awe, mo tara e tongana wen ti nginza so a kporo ni na ya ti wâ.

¹¹Mo sara si e ti na ya ti gbanda, mo zia anengo kungba na ndö ti e.

¹²Mo yeda si azo ti kpengo na mbarata atambula na ndö ti li ti e. E hon na ya ti wâ, e hon na ya ti ngu, me mo zi e na ya ni ti mu na e kodro so gba ti aye asi singo daa.

¹³Mbi yeke li na ya ti da ti mo ti mu na mo *sandaga so a yeke gbi ni kue na wâ; zendo so mbi mu na mo, mbi yeke sara ye alingbi na ni.

¹⁴Mbi mu lani zendo ni na ndembe so mbi yeke na ya ti ye ti ngangu.

¹⁵Mbi yeke mu na mo anyama ti mafuta na sandaga so ayeke gbi ni kue na wâ, mbi yeke mu na mo akoli-taba na sandaga so a yeke gbi ni kue na wâ, mbi yeke mu na mo akoli-bagara na akoli-ngasa. Luti kete

¹⁶Ala so kue ayeke kpe mbeto ti Nzapa, ala ga, ama; fade mbi yeke fa na ala ye so lo sara ndali ti mbi.

¹⁷Mbi dekongo na lo, mbi he bia ti gonda na lo.

¹⁸Tongana mbi bata fade sioni ye na be ti mbi, ka Kota Gbia ama mbi pepe.

¹⁹Me Nzapa ama mbi awe, lo zia mê ti lo kpoo, lo ma sambela ti mbi awe.

²⁰Mbi mu singila na Nzapa, lo so lo ke pepe ti ma sambela ti mbi, lo so lo gbanzi nzoni be ti lo na mbi pepe.