Read sango Abia (Psaumes) 69 Bible Online

Abia (Psaumes) 69 - sango bible

Abia (Psaumes) 69

¹Bia ti David; bia so ayeke ndali ti makonzi-bia. A he ni na kundi.

²O Nzapa, soo mbi, ngu amene mbi asi na go ti mbi!

³Mbi yeke li na ya ti potopoto so ali mingi, mbeni ndo titene mbi luti daa ayeke daa pepe. Mbi si na ya ti ngu so gbe ni ali mingi, ngangu ti ngu ni amu mbi ti hon na mbi.

⁴Mbi dekongo ngbii mbi woko awe, go ti mbi kue gi wâ, le ti mbi abaa ndo na mbage ti mo, Nzapa ti mbi gbaa.

⁵Azo so be ti ala ake mbi senge senge so, wungo ti ala ayeke mingi ahon wungo ti kua ti li ti mbi. Azo so aye ti mingo mbi si be ti ala ake mbi senge senge so, ala yeke na ngangu mingi. Ye so mbi nzi ni pepe, mbi lingbi ti kiri na ni tongana nyen?

⁶Nzapa, mo hinga buba ti mbi kue, asioni ti mbi ahonde na le ti mo pepe.

⁷Kota Gbia NZAPA, mo so mo yeke na ndö ti dunia kue, azo so azia be ti ala na ndö ti mo, ayeke nzoni kamene agbu ala ndali ti mbi pepe. Nzapa ti Israel, azo so ayeke gi mo, ayeke nzoni kamene agbu le ti ala ndali ti mbi pepe.

⁸Ndali ti mo laa mbi yeke kanga be na zonga ti azo si kamene agbu le ti mbi kue.

⁹Mbi ga tongana wande ndali ti a-ita ti mbi, tongana zo so azo ti sewa ti lo ahinga lo pepe.

¹⁰Biani, nzara ti da ti mo agbi mbi tongana wâ, zongango so azo azonga mo ati na ndö ti mbi.

¹¹Mbi toto, mbi ke kobe, so kue aga zonga na tere ti mbi.

¹²Mbi yu bongo ti mua, mbi ga ye ti ngia ti ala.

¹³Azo so aduti na ndö ti akota balabala ayeke diko tënë na tere ti mbi, azo ti nyongo samba ayeke he bia na iri ti mbi.

¹⁴Ti mbi, O *KOTA GBIA, mbi sambela gi mo: ngoi titene mo yeda na sambela ni alingbi awe. Nzapa, na lege ti kota nzoni be ti mo, kiri tënë na mbi! Biani, mo laa mo yeke soo mbi na kuâ.

¹⁵Gboto mbi na ya ti potopoto mo sigigi na mbi, mo zia mbi si mbi li na ya ni pepe. Ayeke nzoni mo zi mbi na maboko ti azo so be ti ala ake mbi, mo zi mbi na ya ti ngu so ali mingi!

¹⁶Ayeke nzoni ngangu ti ngu ni amu mbi ahon na mbi pepe; ayeke nzoni ngu so ali mingi amene mbi pepe, du ti kuâ akanga yanga ti lo na ndö ti mbi pepe!

¹⁷KOTA GBIA, kiri tënë na mbi, ngbanga ti so nzoni be ti mo ayeke nzoni. Ndali ti so mo yeke baa mawa ti azo mingi, bi le ti mo na mbage ti mbi.

¹⁸Kiri mo honde le ti mo na mbi, zo ti kua ti mo pepe. Aye ti ngangu ahon ndö ti mbi awe, kiri tënë na mbi hio si!

¹⁹Ga nduru na tere ti mbi; mu mbi, mo bata mbi! Ndali ti awato ti mbi, mo zi mbi!

²⁰Mo hinga so azo azonga mbi, ala zia kamene na le ti mbi, ala he mbi na ngia; awato ti mbi kue laa ayeke na dawa ti mo so.

²¹Zongango ndo afâ be ti mbi na ka, lege titene ka ni amu ayeke daa pepe. Mbi ku titene mbeni zo azi vundu na be ti mbi, me mbi ku gbaa. Mbi gi titene mbeni zo asara si be ti mbi ade, me mbi wara zo oko pepe.

²²Ala zia sioni yoro na ya ti kobe ti mbi; tongana nzara ti ngu asara mbi, ala mu na mbi kpingo vin ti nyon.

²³Ayeke nzoni akobe ti matanga ti ala aga gbanda ndali ti ala, aga kuku ndali ti azo so ala tisa ala!

²⁴Ayeke nzoni le ti ala avuko si ala kiri abaa ndo pepe! Mo sara si peko ti ala aba bango lakue!

²⁵Tuku sioni ngonzo ti mo na ndö ti ala, ayeke nzoni ngonzo ti mo ti wâ ati na ndö ti ala.

²⁶Ayeke nzoni bâbâ ti ala abuba kue si zo oko akiri aduti na da ti ala ti bongo pepe,

²⁷ngbanga ti so zo so mo pika lo so, ala sara ngangu na lo mingi. Azo so mo zia ka na tere ti ala so, ala yeke diko tënë ti pasi ti azo ni.

²⁸Su sioni ti ala na le ti mbeti, kiri mo baa ala tongana azo ti mbirimbiri pepe.

²⁹Zi iri ti ala na mbeti so a su iri ti azo so ayeke na taa fini daa, zia iri ti ala na popo ti azo ti mbirimbiri pepe.

³⁰Ti mbi, mbi yeke zo ti mawa, mbi yeke baa pasi, me mo Nzapa, na lege so mo yeke yo mbi na nduzu, fade mo yeke soo mbi na kuâ.

³¹Fade mbi yeke he bia ti sepela na iri ti Nzapa, mbi yeke mu singila ti fa so lo yeke kota.

³²Baa ye so anzere na be ti KOTA GBIA laa, anzere ahon bagara so mbi lingbi ti mu na lo, wala koli-bagara so adidi ti lo na asokoto ti gere ti lo ayeke daa.

³³Asenge zo ayeke baa ye ni si ala yeke duti na ngia: “Ala so ayeke gi Nzapa, ayeke nzoni ala te gigi aninga!

³⁴Biani, KOTA GBIA ayeke ma azo ti mawa, azo ti lo so ayeke na da ti kanga, lo yeke ke ala pepe.

³⁵Ala ayayu, sese, na akota ngu-ingo, na aye so kue ayeke na ya ni, ala sepela KOTA GBIA!

³⁶Biani, fade Nzapa ayeke soo *Sion, lo yeke kiri ti leke agbata ti Juda. Fade azo ti lo ayeke mu agbata ni ti ga ti ala si ala yeke kiri ti lango daa.

³⁷Amolenge ti azo ti kua ti Nzapa ayeke mu ni titene aga ti ala, azo so aye KOTA GBIA ayeke lango daa.”