Read sango Abia (Psaumes) 71 Bible Online

Abia (Psaumes) 71 - sango bible

Abia (Psaumes) 71

¹*KOTA GBIA, mbi kpe na mo ti bata tere ti mbi; sara si kamene agbu le ti mbi laoko pepe!

²Mo so mo yeke bata tënë ti yanga ti mo, zi mbi, sigigi na mbi na ya ti kpale; dingi mê ti mo, mo ma mbi, soo mbi!

³Ga tongana kota têne so mbi yeke luti na ndö ni ti bata tere ti mbi, ndo so mbi lingbi ti kpe daa lakue. Mo mu yanga ti soo mbi. Biani, mo yeke tongana kota têne so mbi luti na ndö ni, tongana ngangu gbagba na tere ti mbi.

⁴Nzapa ti mbi, zi mbi na maboko ti zo ti sioni, zi mbi na maboko ti azo ti kirikiri nga na maboko ti azo ti sarango ngangu na azo.

⁵Kota Gbia NZAPA, na ndembe so mbi de molenge ngbii asi laso, mbi zia be ti mbi ti ku mo, mbi zia be ti mbi na ndö ti mo.

⁶Ti londo na lango so a du mbi ngbii asi fadeso, mbi zia tere ti mbi kue na maboko ti mo, mo laa mo sara si mbi sigigi na ya ti mama ti mbi; fade mbi yeke sepela mo lakue.

⁷Azo mingi abaa mbi tongana mbeni ye ti dongo be, me mo yeke tongana ngangu gbagba so mbi kpe daa ti bata tere ti mbi.

⁸Gi tënë ti sepelango mo laa asi singo na yanga ti mbi. Na lango oko oko kue, mbi yeke ngba ti tene tënë ti gonda ti mo.

⁹So fadeso mbi ga mbakoro awe so, mo ke mbi pepe; so ngangu ti mbi ayeke hunzi so, mo zia mbi pepe.

¹⁰Awato ti mbi ayeke tene tënë ti mbi, azo so ayeke *bembe mbi ama tere awe.

¹¹Ala yeke tene: “Nzapa azia lo awe, ala tumba peko ti lo, ala gbu lo; mbeni zo ti zi lo ayeke daa pepe!”

¹²Nzapa, mo hon yongoro na tere ti mbi pepe, Nzapa ti mbi, ga hio mo mu na mbi maboko!

¹³Azo so ayeke bi tënë na li ti mbi so, ayeke nzoni ala ti, kamene agbu le ti ala. Azo so ayeke gi ti sara sioni na mbi so, ayeke nzoni azo abi buba na tere ti ala, azo ane ala pepe si kota kamene agbu le ti ala!

¹⁴Ti mbi, mbi yeke zia be ti mbi ti ku gi mo lakue, mbi yeke ngba ti he bia ti sepela na mo lakue.

¹⁵Mo yeke bata tënë ti yanga ti mo si mo yeke soo azo na kuâ; fade mbi yeke tene tënë ni lakue, ngbanga ti so anzoni ye so mo sara, mbi lingbi ti diko wungo ni pepe.

¹⁶Kota Gbia NZAPA, fade mbi yeke ga ti tene tënë ti akota ye so mo sara; mbi yeke kiri ti tene na azo gi tënë ti mo oko, mo so mo yeke bata tënë ti yanga ti mo.

¹⁷Nzapa, ti londo na ndembe so mbi de molenge ngbii asi laso, mo fa ye na mbi; fadeso mbi ngba ti tene tënë ti akota ye so mo sara.

¹⁸Ataa so mbi ga mbakoro si kua ti li ti mbi avuru awe, Nzapa, mo zia mbi pepe; tongaso si mbi lingbi ti fa ngangu ti mo na azo ti fadeso nga na azo so ayeke ga na peko.

¹⁹Nzapa, batango tënë ti yanga ti mo so mo yeke bata ague ngbii asi na le ti nduzu! Mo sara akota ye mingi! Nzapa, zo wa laa alingbi na mo, zo wa?

²⁰Mo so mo sara si aye ti ngangu na aye ti vundu mingi asi na mbi, me fade mo yeke kiri ti mu na mbi fini; mo yeke kiri ti zi mbi na ya ti kota du so ali mingi ti sigigi na mbi.

²¹Fade mo yeke sara si azo akiri ane mbi mingi, mo yeke kiri ti de be ti mbi.

²²Ti mbi, fade mbi yeke pika kundi ti sepela na mo, Nzapa ti mbi, mbi yeke he bia ti fa so mo yeke bata tënë ti yanga ti mo; mbi yeke pika kete kundi ndali ti mo, Nzapa ti Israel, mo so mo yeke nde si mo yeke nzoni kue so.

²³Fade mbi yeke pika mozoko na mo, mbi yeke dekongo na ngia ndali ti so mo soo fini ti mbi awe.

²⁴Fade mbi yeke kiri ti tene, mo yeke bata tënë ti yanga ti mo lakue. Biani, azo so lani agi ti sara sioni na mbi so, kamene agbu le ti ala si azo abi buba na tere ti ala awe.