Read sango Abia (Psaumes) 72 Bible Online

Abia (Psaumes) 72 - sango bible

Abia (Psaumes) 72

¹Bia ti Salomon. Nzapa, mu ngangu na gbia ti fâ ngbanga tongana mo; mu mbirimbiri ti mo na gbia ni, molenge ti gbia;

²tongaso si lo fâ ngbanga ti azo ti mo na lege ti mbirimbiri si lo fâ ngbanga ti azo ti mawa na legeni mbirimbiri.

³Tongaso, fade akota hoto na akete hoto ayeke sara si azo awara nzoni duti.

⁴Ayeke nzoni gbia ni afâ ngbanga ti azo ti mawa na legeni! Ayeke nzoni lo soo azo so ye atia ala si lo nika zo so ayeke sara ngangu na ala!

⁵Ayeke nzoni azo akpe mbeto ti mo, na ngoi so kue lâ na nze angba ti su ngbii asi na lango ti ndani.

⁶Ayeke nzoni gbia ni aga tongana ngu-Nzapa so ayeke pika na ndö ti pere so a fâ li ni awe; lo ga tongana ngu-Nzapa so atuku na ndö ti sese ngbii si awoko!

⁷Na ngoi so lo ngba ti le-gbia, ayeke nzoni sarango ye ti mbirimbiri angba ti mai na ndo kue, nzoni duti asi singo na ngoi so kue nze angba ti su!

⁸Ayeke nzoni lo sara komandema, ti londo na mbeni kota ngu-ingo ngbii asi na mbeni kota ngu-ingo, ti londo na *bale ti Efrate ngbii asi na nda ti sese kue!

⁹Fade azo ti benyama ayeke kuku na gbe ti lo, awato ti lo ayeke su fuku ti sese.

¹⁰Agbia ti kodro ti Tarsis na ala ti azoa so ayeke yongoro kâ ayeke tokua na lo akadoo; agbia ti kodro ti Saba na ala ti Seba ayeke futa lapo na lo.

¹¹Agbia kue ayeke kuku na gbe ti lo, amara kue ayeke sara kua na lo.

¹²Biani, zo ti mawa so ayeke toto na gbia ni, gbia ni ayeke zi lo na ya ti pasi, zo ti mawa so mbeni zo ti mu maboko na lo ayeke daa pepe, gbia ni ayeke mu maboko na lo.

¹³Zo so ayeke na ngangu pepe nga na zo so ye atia lo, fade gbia ni ayeke baa mawa ti ala si lo yeke soo fini ti ala.

¹⁴Fade lo yeke zi azo ni na ya ti aye ti ngangu nga na ya ti aye ti sioni so azo ayeke sara na ala, ngbanga ti so fini ti ala ayeke kota ye mingi na le ti lo.

¹⁵Gbia na nduzu! Fade a yeke mu na lo lôro ti kodro ti Seba, a yeke sambela ndali ti lo lakue; a yeke sara tufa na ndö ti lo na lango oko oko kue!

¹⁶Ayeke nzoni ale ti *ble asi singo na ya ti kodro ni, ayeke nzoni ale ti ble ni asigigi gbani gbani, amu li ti ahoto tongana ti so keke ayeke mingi na li ti hoto ti Liban! Ayeke nzoni gbata ni amai tongana pere so amu ndö ti sese!

¹⁷Ayeke nzoni iri ti gbia ni angba lakue lakue, ague na nduzu na ngoi so kue lâ angba ti su. Ayeke nzoni azo asara tufa na ndö ti amba ti ala na iri ti lo si azo ti amara kue atene: “Ti lo nzoni!”

¹⁸Singila na *KOTA GBIA, Nzapa ti Israel, gi lo oko si lo yeke sara aye ti kpene!

¹⁹Singila na Nzapa kpu na kpu ndali ti iri ti lo so alingbi na gonda! Ayeke nzoni sese kue asi singo na gonda ti lo! Amen! Amen!

²⁰Sambela ti David, molenge ti Yese ahunzi na ndo so.