Read sango Abia (Psaumes) 73 Bible Online

Abia (Psaumes) 73 - sango bible

Abia (Psaumes) 73

¹Bia ti Asaf. Biani, Nzapa ayeke sara nzoni na azo ti Israel, lo yeke sara nzoni na azo so ayeke na vuru be.

²Me gere ti mbi aye ti *zene, angba gi kete ka mbi ti.

³Biani, mbi baa aye ti azo ti baba ayeke ga nzoni si mbi sara kota be na tere ti azo ti sioni so.

⁴Mbeni ye oko ti so be ti ala ayeke daa pepe ngbii asi na lango ti kuâ ti ala; ala kono, tere ti ala ayeke za zango.

⁵Pasi so ambeni zo ayeke baa, ala hinga ti ala ni pepe; aye ti ngangu so ayeke si na ambeni zo, ayeke si na ala pepe.

⁶Tongaso, baba aga tongana mbeni ye ti go na go ti ala, sarango ngangu na azo aga tongana bongo ti ngangu ngere so ala yeke yu.

⁷Ala te kobe ti mafuta ngbii ndö ti le ti ala asuku si le ti ala ayeke za zango na gbe ni; be ti ala asi singo na asioni tënë.

⁸Ala yeke he azo na ngia, ala yeke tene sioni tënë ti aye ti ngangu so ala ye ti sara na azo; ala yeke tene tënë ni gi na baba.

⁹Ala zi yanga ti ala ti zonga yayu si menga ti ala ayeke kasa ye kue na ndö ti sese.

¹⁰Ndani laa azo ti Nzapa akiri na mbage ti ala, atënë ti azo ni anzere na ala si ala nyon ni tongana ngu.

¹¹Azo ni ayeke tene: “Nzapa ahinga ye oko daa pepe; lo so lo yeke yongoro na nduzu kâ so, lo hinga ye tongana nyen?”

¹²Baa, azo ti sioni so laa: mbeni ye ti so be ti ala ayeke daa pepe, mosoro ti ala angba ti gue na nduzu.

¹³Biani, mbi bata be ti mbi na vurungo ni senge senge, mbi sukula maboko ti mbi ti fa so tënë ayeke na li ti mbi pepe, mbi sara nga ni senge senge.

¹⁴Lakue, angangu ye ayeke si na mbi, lakue na ndaperere, a yeke pika mbi.

¹⁵Tongana mbi tene fade, mbi tene: “Mbi ye ti tene tënë tongana ti ala”, ka mbi ka mara ti amolenge ti mo awe.

¹⁶Mbi gbu li ti mbi na ndö ti tënë so titene mbi hinga nda ni, me ye ni akara mbi

¹⁷ngbii mbi si na ndo so a zia ni nde ndali ti Nzapa. Na ndembe so laa mbi hinga nda ti ye so ayeke ku azo ti sioni so.

¹⁸Biani, mo yeke zia ala na ndö ti lege so azene zenengo, mo yeke sara titene ala ti si ala girisa hio.

¹⁹Gi hio tongaso, ye kue abuba awe! Ti ala ahunzi awe, mbeto afâ ala awe!

²⁰Tongana ti so zo abaa li ti lo si na ndaperere, lo girisa ni, Kota Gbia, na ndembe so mo yeke londo, mo yeke sara si azo agirisa ala.

²¹Lani be ti mbi asee, tënë ni aso be ti mbi mingi,

²²mbi ga buba, mbi hinga nda ti ye ni oko pepe, mbi yeke tongana mbeni nyama na le ti mo.

²³Andaa mbi yeke lakue na mo. Mo gbu maboko ti mbi ti koli,

²⁴mo yeke fa lege na mbi alingbi na ye so mo leke na be ti mo, na pekoni, fade mo yeke yamba mbi na gonda.

²⁵Zo wa laa ayeke mu maboko na mbi na yayu, zo wa? Gi mo oko! Na ndö ti sese so, mbeni ye nde anzere na mbi pepe, gi mo oko.

²⁶Ataa tere ti mbi na be ti mbi awoko kue, Nzapa laa ayeke mu ngangu na be ti mbi, lo yeke ye so aga ti mbi kpu na kpu.

²⁷Tongaso, zo so ahon yongoro na mo, fade lo yeke kui; zo so azia lege ti mo, mo yeke zi fini ti lo.

²⁸Ti mbi, dutingo nduru na mo Nzapa laa ayeke sara nzoni na mbi. Mbi kpe na mo Kota Gbia NZAPA ti bata tere ti mbi, ti fa aye so kue mo sara.