Read sango Abia (Psaumes) 75 Bible Online

Abia (Psaumes) 75 - sango bible

Abia (Psaumes) 75

¹Bia ti Asaf. Bia so ayeke ndali ti makonzi-bia. A he ni na go ti bia so iri ni: “Mo buba ye pepe.” Bia.

²Nzapa, e mu singila na mo, e mu singila na mo, ngbanga ti so mo ga nduru na e awe; e yeke tene tënë ti akota ye so mo sara.

³Nzapa atene: “Ngoi so mbi diko so, tongana alingbi awe, mbi wani laa mbi yeke fâ ngbanga na legeni.

⁴Fade sese na azo ti ndö ni kue ayeke yingi. Mbi laa mbi sara si gere ti sese aluti ngangu pepe?” Luti kete

⁵Mbi tene na azo ti baba, mbi tene: “Ti fadeso, baba ni ahunzi awe!” Mbi tene na azo ti sioni, mbi tene: “Ala fa tere ti ala pepe!

⁶Fango tere ti ala ni ahunzi awe; ala zia atënë ti baba ti ala so!

⁷Ye so asara si zo aga kota alondo na To wala na Do pepe, ye so asara si zo aga kota alondo nga na benyama pepe,

⁸ngbanga ti so Nzapa laa ayeke fâ ngbanga: lo yeke zia zo na kete ndo, lo yeke zia mbeni na kota ndo.”

⁹*KOTA GBIA agbu mbeni kopo na maboko ti lo, vin so ayeke kporo kporongo asi ya ni. Lo tuku vin ni na azo ti sioni ti sese kue, fade ala yeke nyon ni ngbii asi na puru ni.

¹⁰Ti mbi, fade mbi yeke ngba lakue ti he bia ti sepela na Nzapa ti Jacob si mbi yeke fa tënë ti lo, mbi tene:

¹¹“Pikango kate so azo ti sioni kue ayeke pika so, fade mbi yeke sara si ahunzi; me mbi yeke sara si pikango kate ti azo ti mbirimbiri ague na nduzu.”