Read sango Abia (Psaumes) 78 Bible Online

Abia (Psaumes) 78 - sango bible

Abia (Psaumes) 78

¹Bia ti Asaf. Bia ti fango ye na zo. Azo ti mbi, ala ma fango ye ti mbi, ala zi mê ti ala, ala ma atënë ti yanga ti mbi.

²Mbi yeke zi yanga ti mbi ti tene tënë na lege ti mbeni toli si ye so angba ando na hondengo ni, e lingbi ti manda ye na lege ni.

³Aye so asi ando so, e ma tënë ni awe, e hinga ni awe; ababâ ti e atene peko ni na e awe.

⁴E yeke honde ni na amolenge ti e pepe, me e yeke tene na azo so a yeke du ala na peko tënë ti gondango *KOTA GBIA, ngangu ti lo nga na akota ye so lo sara.

⁵Lo mu komandema na azo ti Jacob, lo lu ndia na Israel. Lo mu yanga na akotara ti e ti fa ye ni na amolenge ti ala.

⁶Tongaso, azo so a yeke du ala na peko nga na amolenge so fade a yeke du ala, ahinga tënë ni si ala lingbi ti fa ni na amolenge ti ala.

⁷Tongaso, azo so a yeke du ala na peko, fade ala yeke zia be ti ala na ndö ti Nzapa si akota ye so lo sara, ala yeke girisa ni pepe, ala yeke bata andia ti lo;

⁸fade ala yeke sara ye tongana ti akotara ti ala pepe, akotara ti ala so ayeke ando azo ti ngangu li, azo ti kengo yanga, azo ti be use use, azo so abata yingo ti ala na Nzapa pepe.

⁹Ando, azo ti mara ti Efraim amu akokora na ale ti kokora ti tiri bira, me na ngoi ti bira ni, ala kpe,

¹⁰ngbanga ti so ala bata tënë ti mbuki ti Nzapa pepe, ala ke ti sara ye alingbi na *Ndia ti lo.

¹¹Ala girisa akota ye so lo sara, nga na aye ti kpene so lo fa na ala.

¹²Na Ezipte, na sese ti Soan, na le ti akotara ti ala, Nzapa asara ye ti kpene:

¹³lo kangbi ya ti kota ngu-ingo, lo sara si ala hon na ya ni; lo sara si ngu ni aluti tongana mbeni kota gbagba.

¹⁴Na kota lâ, lo fa lege na ala na lege ti mbinda; na bi kue, lo fa lege na ala na lege ti zango ti wâ.

¹⁵Na benyama, lo suru ya ti akota têne ti mu na ala ngu titene ala nyon, ngu so ayeke tongana ngu ti kota du so ali mingi.

¹⁶Lo sara si ngu asigigi na ya ti têne, ngu ni asua tongana ngu ti *bale.

¹⁷Me ala ngba ti sara siokpari ti ke lo, ala ngba ti sara ngangu li na Nzapa so ayeke na yayu kâ na ndö ti aye kue.

¹⁸Taa na be ti ala, ala tara be ti Nzapa, ala hunda lo ti mu na ala kobe ti tengo ni alingbi na ye so be ti ala aye.

¹⁹Ala tene tënë na tere ti Nzapa, ala tene: “Nzapa alingbi ti mu na e kobe na benyama?

²⁰Biani, lo pika kota têne, ngu asigigi daa, ngu ni asua gbani gbani. Me lo lingbi nga ti mu na e mapa wala lo lingbi nga ti mu nyama na azo ti lo?”

²¹KOTA GBIA ama tënë so si ngonzo agbu lo; ngonzo ti lo alondo tongana wâ na tere ti Jacob, ngonzo ni alondo na tere ti Israel,

²²ngbanga ti so ala zia be ti ala na ndö ti Nzapa pepe, ala ke ti ma na be so lo lingbi ti soo ala na kuâ.

²³Na pekoni, lo mu yanga na mbinda ti nduzu, lo zi yanga ti yayu.

²⁴Titene lo mu na ala kobe ti tengo ni, lo sara si *mane atuku na ndö ti ala tongana ngu-Nzapa, lo mu na azo ti lo mapa so alondo na yayu.

²⁵Zo oko oko ate kobe ti *a-ange; lo tokua na ala kobe, ala te ya ti ala asi.

²⁶Na yayu kâ, Nzapa asara si pupu ti To aya, na lege ti ngangu ti lo, lo mu yanga si pupu ti Mbongo aya.

²⁷Lo sara si gba ti kasa ti andeke atuku na ndö ti ala tongana fuku ti sese, andeke mingi atuku tongana mbutu ti yanga ti kota ngu-ingo.

²⁸Lo sara si andeke ni ati na ya ti bâbâ ti ala nga na tere ti ada ti ala ti bongo.

²⁹Ala te kobe, ya ti ala asi, Nzapa amu na ala ye alingbi na nzara ti ala.

³⁰Me nzara ti ala ni ade ti hunzi pepe, kobe ni angba na yanga ti ala

³¹si ngonzo ti Nzapa ati na ndö ti ala, lo fâ angangu zo na popo ti ala, lo kinda amaseka ti Israel.

³²Ataa so kue, azo ti Israel angba lakue ti sara siokpari, akota ye so Nzapa asara, ala ma na be na ni pepe.

³³Tongaso, Nzapa akai fini ti ala si aga ye senge, fini ti ala ahunzi na lege ti kota mbeto.

³⁴Lakue tongana Nzapa ayeke fâ ambeni, atanga ni ayeke gi lo, ala yeke kiri na mbage ti lo;

³⁵ala dabe ti ala atene, Nzapa ayeke kota têne so ala luti na ndö ni; lo so lo yeke na yayu kâ na ndö ti aye kue si lo yeke gbu koko ti ala so.

³⁶Me ala yeke handa lo na lege ti tënë ti yanga ti ala; ala yeke tene mvene na lo na lege ti menga ti ala.

³⁷Ala zia be ti ala kue na lo pepe, ala bata tënë ti mbuki ti lo pepe.

³⁸Me lo, lo yeke baa mawa ti zo, lo yeke zi sioni na li ti ala, lo yeke fâ ala pepe. Fani mingi, lo kanga lege na ngonzo ti lo, lo sara si sioni ngonzo ti lo alondo pepe.

³⁹Lo dabe ti lo so ala yeke azo senge, ala yeke tongana pupu so ayeke hon si ayeke kiri pepe.

⁴⁰Lege mingi, ala sara ngangu li na lo na benyama, ala so be ti lo na ndo so ngu ayeke daa pepe.

⁴¹Ala kiri atara be ti Nzapa, ala kiri azia vundu na be ti Nzapa ti Israel, lo so lo yeke nde si lo yeke nzoni kue so.

⁴²Ala girisa aye so lo sara ando na lege ti ngangu ti lo; ala girisa lango so lo zi ala na maboko ti wato ti ala.

⁴³Ala girisa aye ti dongo be so lo sara na sese ti Ezipte, ala girisa aye ti kpene so lo sara na sese ti Soan:

⁴⁴lo sara si amaboko ti akota ngu ti ala na angu ti ala so ayeke sua aga mene, azo ti Ezipte alingbi ti nyon ni pepe.

⁴⁵Lo tokua asioni ngungu ti te ala, lo tokua akongba ti buba ye kue na ya ti kodro ti ala.

⁴⁶Lo tokua angadi ti te ale ti kobe ti ala, lo tokua agbadola ti te aye ti peko ti kua ti ala.

⁴⁷Lo buba ayaka ti vinye ti ala na lege ti *apembe ti bekpa, lo buba akeke ti sikomor ti ala na lege ti ngangu de.

⁴⁸Lo zia abagara ti ala si apembe ti bekpa afâ ala, lo zia ataba ti ala si bekpa afâ ala.

⁴⁹Nzapa atokua kota ngonzo ti lo na ndö ti azo ti Ezipte: ngonzo ti lo ti wâ, sioni ngonzo, aye ti ngangu; lo tokua a-ange ti bingo kpale na tere ti ala.

⁵⁰Lo zia lege na ngonzo ti lo ti sara kua ti lo, lo kiri lo kanga lege na kuâ pepe ti fâ ala, lo zia lege na sioni kobela ti bubango kodro ti fâ ala.

⁵¹Na Ezipte, na popo ti *ahale ti Kam, lo fâ akozo molenge-koli kue, amolenge so azo adu ala na ngoi so azo ni angba na ngangu ti tere ti ala.

⁵²Lo sara si azo ti lo asigigi tongana ataba na ya ti gbagba so a yeke bata ala daa. Lo fa lege na ala na benyama tongana ti so wabatango-taba ayeke fa lege na ataba ti lo.

⁵³Lo fa lege na ala, ye oko ti sara ala ayeke daa pepe, mbeto ti mbeni ye asara ala pepe na ndembe so kota ngu-ingo amene awato ti ala.

⁵⁴Na pekoni, lo gue na ala na sese ti lo, sese so ayeke nde si ayeke nzoni kue; lo gue na ala na li ti hoto so lo mu ni na lege ti ngangu ti lo.

⁵⁵Lo tumba amara nde na dawa ti ala, lo haka sese ti amara ni si lo kangbi ni na azo ti lo titene aga ti ala, lo sara si amara ti Israel aduti na gbe ti ada ti bongo ti azo ni.

⁵⁶Me azo ti Israel atara be ti Nzapa, Nzapa so ayeke na yayu kâ na ndö ti aye kue; ala sara ngangu li na lo, aye so lo hunda na ala ti sarango ni, ala sara ye alingbi na ni pepe.

⁵⁷Tongana ti so akotara ti ala asara, ala mu mbeni sioni lege, ala zia lege ti Nzapa, ala yeke tongana kokora so aba bango, so zo alingbi ti zia be ti lo na ndö ni pepe.

⁵⁸Na lege ti ando so ala leke na ndö ti ahoto si ala yeke voro anzapa nde daa, ala zia ngonzo mingi na be ti Nzapa; na lege ti ayanda ti ala, ala pusu lo ti sara mbanda.

⁵⁹Nzapa ama tënë ni si ngonzo agbu lo, lo ke azo ti Israel biani.

⁶⁰Lo zia da ti lo so ayeke na kodro ti Silo, da ti lo ti bongo so lo sara na popo ti azo.

⁶¹Sanduku ti mbuki ti lo so afa gonda ti lo nga na ngangu ti lo, lo zia ni na maboko ti awato si ala gue na ni na ndo ti ala.

⁶²Ngonzo agbu lo na tere ti azo so aga ye ti lo, lo zia ala si a fâ ala kue kue kue.

⁶³Wâ agbi amaseka-koli ti ala; ti amaseka-wali, zo oko akiri ahe bia ti gondango na ala pepe.

⁶⁴A fâ awayango-sandaga na yanga ti bira, awali-mua atoto kuâ pepe.

⁶⁵Na pekoni, KOTA GBIA azingo na lango tongana zo so azingo na lango, tongana ngangu zo ti bira so samba ayapu lo.

⁶⁶Lo pika awato ti lo so akpe si azia peko na lo, lo zia kamene na le ti ala biani biani.

⁶⁷Lo zia amolenge ti Joseph yamba, lo ke ti soro mara ti Efraim.

⁶⁸Me lo soro mara ti Juda, lo ye gi hoto ti *Sion.

⁶⁹Kâ, lo sara kota da ti lo so ayeke nde si ayeke nzoni kue, da ni akpengba tongana yayu, tongana sese, lo lu gere ti da ni titene da ni angba kpu na kpu.

⁷⁰Lo soro David, zo ti kua ti lo, lo gue, lo mu lo na ya ti gbagba ti batango anyama

⁷¹na ndembe so lo yeke bata ataba. Lo sara si lo ga zo ti batango azo ti Jacob, azo ti lo; lo ga zo ti batango azo ti Israel, ye ti lo.

⁷²David abata azo ni tongana wabatango-taba so ayeke na sioni be pepe, lo fa lege na ala nzoni na lege ti ndara.