Read sango Abia (Psaumes) 81 Bible Online

Abia (Psaumes) 81 - sango bible

Abia (Psaumes) 81

¹Bia ti Asaf; bia so ayeke ndali ti makonzi-bia. A he ni na mara ti kundi ti azo ti gbata ti Gat.

²Ala he bia na ngia na Nzapa so ayeke mu ngangu na e, ala dekongo na ngia na Nzapa ti Jacob.

³Ala pika mozoko, ala pika kete ngo, kundi so ayeke sara mozoko pendere, ala pika ni, ala pika kota kundi.

⁴Na sigingo ti fini nze, ala huru didi; na ndembe so nze ayeke su ngangu, ala huru didi na lango ti matanga ti e!

⁵Biani, so ayeke mbeni ndia ndali ti azo ti Israel, mbeni kpengba tënë ti Nzapa ti Jacob;

⁶mbeni tënë ti ndia so Nzapa alu ndali ti sewa ti Joseph na ndembe so lo gue ti tiri bira na azo ti Ezipte. Mbi ma mbeni go so mbi hinga ni pepe, atene:

⁷“Mbi zi nengo kungba na ndö ti go ti mo awe, mo zia ti yo nengo sakpa awe.

⁸So lani mo yeke na ya ti ye ti ngangu si mo dekongo na mbi so, mbi zi mo na ya ni. Mbi kiri tënë na mo na ya ti mbinda; mbi tara be ti mo na tere ti ngu ti Meriba. Luti kete

⁹Azo ti mbi, ala ma mbi si, mbi yeke na mbeni tënë ti tene na ala. Mo Israel, tongana mo ma fade mbi, ka ayeke nzoni mingi!

¹⁰Fade mbeni nzapa nde ayeke duti na sese ti mo pepe, fade mo yeke kuku ti voro mbeni nzapa nde pepe.

¹¹Mbi laa mbi yeke *KOTA GBIA, Nzapa ti mo, mbi laa mbi sara si mo sigigi na sese ti Ezipte. Mo zi yanga ti mo kota, fade mbi zia aye daa asi.”

¹²Me azo ti mbi ama yanga ti mbi pepe, azo ti Israel aye tënë ti mbi pepe.

¹³Tongaso, mbi zia ala ti ngba na kpengbango be ti ala, ala sara ye so ala leke na be ti ala ti sarango ni!

¹⁴Âa! Tongana azo ti mbi ama fade mbi, tongana azo ti Israel atambula fade na lege ti mbi,

¹⁵ka mbi kinda gi hio tongaso awato ti ala, ka mbi pika azo ti sarango ngangu na ala so awe!

¹⁶Azo so ake KOTA GBIA so, ka ala kuku na gbe ti lo ti voro lo; ye so a diko ndali ti ala kpu na kpu laa.

¹⁷Ka KOTA GBIA ayeke mu nzoni kobe mingi na azo ti Israel si lo yeke mu na ala mafuta ti wotoro ti ngonda titene ala su alingbi na nzara ti ala.