Read sango Abia (Psaumes) 83 Bible Online

Abia (Psaumes) 83 - sango bible

Abia (Psaumes) 83

²O Nzapa, mo ngba ti kai kaingo pepe, mo kanga maboko ti mo pepe, mo duti kpoo pepe!

³Baa, awato ti mo ayeke sara wusuwusu, azo so ake mo ayeke yo li ti ala na nduzu.

⁴Ala leke tënë na hondengo ni na tere ti azo ti mo, ala ma tere ti sara sioni na azo so mo yeke bata ala.

⁵Azo ni atene: “Ala ga, e hunzi mara ti ala si azo akiri adi iri ti Israel pepe.”

⁶Ala ma tere si ala kue ayeda ti ga *ambuki ti ke mo.

⁷Azo ni ayeke azo ti Edom, ti Ismael, ti Moab na azo ti Agar,

⁸azo ti Gebal, ti Amon, ti Amalek, ti Filistii nga na azo ti gbata ti Tir.

⁹Ataa azo ti Asirii kue abongbi na ala ti mu maboko na *ahale ti Lot. Luti kete

¹⁰Sara na ala tongana ti so mo sara na Madian, tongana ti so mo sara na Sisra nga na Yabin na yanga ti ngu ti Kishon.

¹¹A fâ ando ala na tere ti du ti ngu ti Dor; kuâ ti ala aga tongana puru na ndö ti sese.

¹²Sara na akota zo ti ala tongana ti so mo sara na Oreb nga na Zeb; sara na amakonzi ti ala tongana ti so mo sara na Zeba nga na Salmuna.

¹³Azo so atene: “E mu kodro ti Nzapa si aga ti e!”

¹⁴Nzapa ti mbi, sara si ala ga tongana holengo kugbe, wala tongana holengo pere so pupu amu ahon na ni.

¹⁵Tongana ti so wâ ayeke gbi gbako, tongana ti so menga ti wâ ayeke gbi ahoto,

¹⁶tumba peko ti ala na kota pupu ti mo; sara si ngangu pupu ti mo azia kota mbeto na be ti ala.

¹⁷Zia kamene na le ti ala, tongaso si ala kiri na mbage ti mo, *KOTA GBIA.

¹⁸Ayeke nzoni kamene na mbeto agbu ala lakue lakue. Ayeke nzoni kota kamene agbu ala si ala kui kue!

¹⁹Ayeke nzoni ala hinga atene, mo oko laa mo yeke KOTA GBIA, mo oko laa mo yeke Nzapa so ayeke na yayu kâ na ndö ti aye kue na sese so.