Read sango Abia (Psaumes) 85 Bible Online

Abia (Psaumes) 85 - sango bible

Abia (Psaumes) 85

¹Bia ti azo ti Kore; bia so ayeke ndali ti makonzi-bia.

²*KOTA GBIA, mo sara nzoni be na kodro ti mo awe; *ahale ti Jacob so a gbu ala ando a gue na ala na kodro wande so, mo sara si ala kiri awe.

³Mo zi sioni ti azo ti mo awe, mo zi siokpari ti ala kue na li ti ala awe. Luti kete

⁴Mo kai ngonzo ti mo awe, mo zia lege ti ngonzo ti mo ti wâ awe.

⁵Nzapa, wasongo e, sara si e kiri maa! Zia ti bata e na be.

⁶Mo yeke ngba ti sara ngonzo na tere ti e tongaso lakue? Mo yeke ngba ti bata ngonzo ti mo na tere ti e ngu na ngu?

⁷Mo laa mo yeke kiri ande ti sara si e duti na fini pepe? Mo laa mo yeke kiri ti sara si azo ti mo aduti na ngia pepe?

⁸KOTA GBIA, fa na e nzoni be ti mo, soo e na kuâ!

⁹Mbi ye ti ma tënë so KOTA GBIA Nzapa atene: lo tene tënë ti siriri na azo ti lo, na azo ti lo ti nzoni be. Me ayeke nzoni ala kiri asara ye ti buba ti ala pepe.

¹⁰Biani, Nzapa ayeke nduru ti soo azo so ayeke kpe mbeto ti lo, fade gonda ti lo ayeke duti na ya ti kodro ti e.

¹¹Nzoni be na taa-tënë awara tere, sarango ye ti mbirimbiri nga na siriri asu ngbangba ti tere.

¹²Taa-tënë ayeke londo na sese ti ma na nduzu si mbirimbiri ayeke londo na yayu ti zu na sese.

¹³KOTA GBIA wani laa ayeke sara titene e duti nzoni si sese ti e adu ale ti kobe.

¹⁴Ye ti mbirimbiri ayeke tambula na dawa ti KOTA GBIA si ayeke suru lege titene lo hon daa.