Read sango Abia (Psaumes) 9 Bible Online

Abia (Psaumes) 9 - sango bible

Abia (Psaumes) 9

¹Bia ti David; bia so ayeke ndali ti makonzi-bia. A he ni na kundi.

²*KOTA GBIA, mbi yeke mu singila na mo na be ti mbi kue; mbi yeke tene tënë ti akota ye so kue mo sara.

³Mbi ye ti dodo na ngia ndali ti mo, mbi ye ti he bia ti sepela iri ti mo, Nzapa so ayeke na yayu kâ na ndö ti aye kue!

⁴Awato ti mbi akiri na peko; ala ye ti ti si ala kui na le ti mo,

⁵ngbanga ti so mo fâ ngbanga ti mbi mbirimbiri, mo gbu koko ti mbi awe. Mo duti na ndö ti mbata ti mo ti gbia, mo so mo yeke wafango-ngbanga ti mbirimbiri.

⁶Mo be le na amara nde, mo sara si azo ti sioni akui; mo sara si iri ti ala ahon biani biani.

⁷Awato ayeke daa mbeni pepe, a nika ala biani biani awe! Mo buba agbata ti ala kue, azo agirisa ala biani biani awe.

⁸Me KOTA GBIA aduti na ndö ti mbata ti lo ti gbia kpu na kpu. Lo sara si mbata ti lo ti gbia akpengba si lo duti ti fâ ngbanga.

⁹Lo laa lo yeke sara komandema na ndö ti dunia mbirimbiri; lo laa lo yeke fâ ngbanga ti amara na legeni.

¹⁰KOTA GBIA ayeke tongana ngangu gbagba so ayeke bata azo so a sara ngangu na ala; lo yeke tongana ngangu gbagba so ayeke bata azo na ngoi ti aye ti ngangu.

¹¹Azo so ahinga mo, ayeke nzoni ala zia be ti ala na ndö ti mo; azo so ayeke gi mo, KOTA GBIA, mo yeke zia ala pepe.

¹²Ala he bia na KOTA GBIA, lo so mbata ti lo ti gbia ayeke na *Sion; ala tene na amara tënë ti akota ye so lo sara.

¹³Azo so atuku mene ti amba ti ala, lo yeke hunda tënë ni na ala, lo yeke dabe ti lo na ni; lo yeke girisa toto ti azo ti mawa pepe.

¹⁴KOTA GBIA, baa mawa ti mbi! Baa pasi so azo ti kengo mbi asara na mbi, mo so mo yeke zi mbi na yanga ti kuâ.

¹⁵Tongaso, fade mbi yeke ngba ti gonda mo, mbi yeke gonda mo na ndo so azo ti Sion ayeke bongbi tere daa; mbi yeke ngba ti dodo na ngia ndali ti so mo soo mbi awe.

¹⁶Azo ti mara nde ati na ya ti du so ala wani azi; kuku so ala leke na hondengo ni, kuku ni akiri agbu gere ti ala wani.

¹⁷KOTA GBIA asara si azo ahinga lo, lo fâ ngbanga awe: lo gbu zo ti sioni na ya ti kuku ti zo ni wani. Kete mozoko. Luti kete

¹⁸Ayeke nzoni azo ti sioni akiri na ndo ti akuâ, amara so kue be ti ala agirisa na Nzapa.

¹⁹Me azo so ye atia ala, Nzapa ayeke girisa ala biani biani pepe; azo ti mawa so azia be ti ala ti ku ye, ala yeke ku ni gbaa pepe.

²⁰KOTA GBIA, londo! Ayeke nzoni zo ahon ndö ti mo pepe! Ayeke nzoni mo fâ ngbanga ti amara nde na dawa ti mo.

²¹KOTA GBIA, zia kota mbeto na be ti ala! Ayeke nzoni azo ti mara nde ahinga atene, ala yeke gi azo senge! Luti kete