Read sango Abia (Psaumes) 90 Bible Online

Abia (Psaumes) 90 - sango bible

Abia (Psaumes) 90

¹Sambela ti Moïse, zo ti Nzapa. Kota Gbia, ngu na ngu, mo yeke ndo so e yeke kpe daa ti bata tere ti e.

²Kozoni si ahoto abaa gigi, kozoni si mo sara sese na dunia, mo yeke Nzapa ngbene ye kpu na kpu, lakue lakue!

³Mo sara si zo akiri na ya ti fuku ti sese, mo tene: “Amolenge ti Adam, ala kiri na ya ti fuku ti sese!”

⁴Biani, na le ti mo, ngu saki oko ayeke tongana lango ti biri so ahon, wala tongana nduru ngbonga ti bi oko.

⁵Mo sara si fini ti zo ahon tongana ti so lango ti ndaperere ayeke hon na le ti zo, tongana pere so asigigi.

⁶Na ndaperere, kongo ti pere ni asigigi, akono; na lakui, awoko si ahole.

⁷Biani, ngonzo ti mo ahunzi e awe, ngonzo ti mo ti wâ azia kota mbeto na be ti e.

⁸Mo zia asioni ti e na le ti mo, aye so e sara na gbe mingo asigigi polele na le ti mo.

⁹Biani, ndali ti ngonzo ti mo, alango ti fini ti e akiri ayo pepe; ngu ti e ayeke hunzi hio tongana pupu ti ya ti zo.

¹⁰Lango ti fini ti e ayeke si na ngu balembarambara; ti azo so ayeke na ngangu, ayeke si na ngu balemiombe, me ye so e yeke wara daa ayeke pasi na mawa. Ngu ayeke hon hio mingi si e nga, e yeke hon hongo.

¹¹Zo wa laa alingbi ti hinga ngangu ti ngonzo ti mo? Zo so akpe mbeto ti mo laa ahinga ngonzo ti mo nzoni mingi!

¹²Tongaso, fa na e lege ti diko alango ti e si fade be ti e asi singo na ndara.

¹³*KOTA GBIA, ngonzo ti mo ayeke ngba ngbii asi lawa? Kiri na mbage ti e, baa mawa ti e, azo ti kua ti mo!

¹⁴Gi na ndaperere, sara nzoni be ti mo na e gbani gbani; tongaso, na lango ti fini e kue, fade e yeke dekongo na ngia.

¹⁵Na ya ti angu mingi, mo sara si aye ti ngangu mingi asi na e; sara si e wara ngia alingbi na angu so e baa pasi so.

¹⁶Ayeke nzoni azo ti kua ti mo abaa anzoni ye so mo sara si *ahale ti ala abaa gonda ti mo!

¹⁷Kota Gbia, Nzapa ti e, sara si nzoni be ti mo aduti na ndö ti e! Sara si peko ti kua ti maboko ti e aga nzoni. Biani, sara si peko ti kua ti maboko ti e aga nzoni.