Read sango Abia (Psaumes) 91 Bible Online

Abia (Psaumes) 91 - sango bible

Abia (Psaumes) 91

¹Zo so ahonde tere ti lo na gbe ti Nzapa so ayeke na yayu kâ na ndö ti aye kue, zo ni ayeke duti na siriri na gbe ti lo so ngangu ti lo ahon angangu kue.

²Zo ni ayeke tene na *KOTA GBIA, atene: “Mo yeke ndo so mbi kpe daa ti bata tere ti mbi, mo yeke tongana ngangu gbagba na tere ti mbi; mo yeke Nzapa ti mbi, mbi zia be ti mbi na ndö ti mo.”

³— Biani, lo laa lo yeke zi mo na ya ti kuku so zo aleke ti gbu na mo; lo laa lo yeke zi mo na ya ti sioni kobela ti bubango kodro.

⁴Lo yeke bata mo na gbe ti maboko ti lo, mo yeke honde tere ti mo na gbe ti maboko ti lo tongana ti so molenge ti ndeke ayeke honde tere ti lo na gbe ti maboko ti mama ti lo. Batango tënë ti yanga ti lo so lo yeke bata ayeke tongana vala na kazaka ti wen so ayeke bata mo.

⁵Fade mo yeke sara mbeto ti aye so pepe: ataa asioni ye ti bi so ayeke zia mbeto na be ti zo, ataa le ti kokora so a bi na kota lâ,

⁶ataa sioni kobela ti bubango kodro so ayeke hara zo na ya ti vukongo ndo, ataa ndonga so ayeke fâ azo na kota lâ.

⁷Tongana azo saki oko ati na tere ti mo, wala azo saki baleoko ati na mbage ti maboko ti mo ti koli, fade ye oko ayeke sara mo pepe.

⁸Zi gi le ti mo, fade mo yeke baa lege so Nzapa ayeke kiri na azo ti sioni peko ti sioni so ala sara.

⁹— Biani, KOTA GBIA, mo laa mo yeke ndo so mbi kpe daa ti bata tere ti mbi! — So mo sara si Nzapa so ayeke na yayu kâ na ndö ti aye kue aga ndo ti dutingo ti mo,

¹⁰fade sioni ye oko ayeke si na mo pepe, ye ti sioni oko ayeke ga nduru na da ti mo pepe,

¹¹ngbanga ti so fade KOTA GBIA ayeke mu yanga na *a-ange ti lo ti bata mo na ndo so kue mo yeke gue daa.

¹²Fade ala yeke yo mo na maboko ti ala si mo pika gere ti mo na têne pepe.

¹³Mo yeke tambula na ndö ti bamara nga na ndö ti sioni ngbo, mo yeke do sioni nyama nga na angbo na gbe ti gere ti mo.

¹⁴KOTA GBIA atene: “Ndali ti so lo mu tere ti lo kue na mbi, fade mbi yeke soo lo na kuâ, mbi yeke bata lo, ngbanga ti so lo hinga mbi.

¹⁵Tongana lo iri mbi, fade mbi yeke kiri tënë na lo, mbi yeke duti na tere ti lo na ya ti ye ti ngangu so asi na lo; mbi yeke zi lo na ya ti ye ti sioni si mbi yeke sara titene a gonda lo.

¹⁶Fade mbi yeke sara si gigi ti lo ague, ayo, alingbi na be ti lo; mbi yeke fa na lo so mbi yeke wasongo lo.”