Read sango Abia (Psaumes) 92 Bible Online

Abia (Psaumes) 92 - sango bible

Abia (Psaumes) 92

¹Bia. A yeke he ni na *lango ti wungo tere.

²Ayeke nzoni mingi titene azo amu singila na mo *KOTA GBIA, titene ala he bia ti gonda na iri ti mo Nzapa, mo so mo yeke na yayu kâ na ndö ti aye kue!

³Ayeke nzoni mingi titene a fa nzoni be ti mo na azo na kota ndaperere, titene a fa na azo na bi so mo yeke bata tënë ti yanga ti mo.

⁴Ayeke nzoni ala he bia ni na lege ti ye ti mozoko ti kamba baleoko nga na pikango kota kundi na kete kundi.

⁵Biani, sarango ye ti mo azia ngia na be ti mbi mingi, KOTA GBIA! Na bango aye so maboko ti mo asara, mbi yeke dekongo na ngia.

⁶KOTA GBIA, aye so mo sara ayeke kota mingi! Atënë ti be ti mo ali mingi!

⁷Zo ti buba ahinga ye oko daa pepe, zo so li ti lo ayeke daa pepe ahinga nda ni oko pepe.

⁸Ataa azo ti sioni ayeke mai tongana pere, ataa azo ti sarango sioni ayeke tongana kongo so asigigi, fade a yeke hunzi ala biani biani.

⁹Me mo KOTA GBIA, mo so mo yeke na nduzu kâ, mo yeke ngba kpu na kpu.

¹⁰KOTA GBIA, baa awato ti mo; baa, fade awato ti mo ayeke kui si azo ti sarango sioni kue ayeke kangbi kirikiri.

¹¹Mo mu na mbi ngangu tongana ti ngbä, mo tuku na li ti mbi yombo so afun nzoni.

¹²Mbi baa na le ti mbi tingo ti awato ti mbi, mbi ma na mê ti mbi tënë ti azo ti sioni so aga ti tiri na mbi.

¹³Zo ti mbirimbiri ayeke kono tongana keke ti mburu, lo yeke ga kota tongana keke ti sedre ti Liban.

¹⁴Lo yeke tongana keke so a lu na ya ti gbagba ti kota da ti KOTA GBIA, lo yeke kono gi na ya ti gbagba ti Nzapa ti e.

¹⁵Ataa so lo ga kangba awe, lo ngba lakue ti le, lo ngba na ngangu si akugbe ti lo angba fini ni.

¹⁶Ye so laa afa biani atene, KOTA GBIA ayeke mbirimbiri: Lo yeke tongana kota têne so mbi luti na ndö ni ti bata tere ti mbi, mbeni ye ti kirikiri oko ayeke na lo pepe.