Read sango Abia (Psaumes) 94 Bible Online

Abia (Psaumes) 94 - sango bible

Abia (Psaumes) 94

¹*KOTA GBIA, Nzapa so ayeke kiri peko ti sioni na zo! Nzapa, mo so mo yeke kiri peko ti sioni na zo, fa tere ti mo na le ti azo!

²Mo so mo yeke fâ ngbanga ti azo ti sese, londo si! Kiri na azo ti baba peko ti sioni alingbi na sioni so ala sara!

³KOTA GBIA, azo ti sioni so, ala yeke ngba ti dodo na ngia ngbii asi lawa? Ala yeke ngba ngbii asi lawa?

⁴Ala yeke diko atënë ti baba, ala yeke tene atënë ti zonga, ala yeke pika kate ti ala, azo ti sarango sioni so kue so.

⁵KOTA GBIA, ala yeke nika azo ti mo, ala yeke sara pasi na azo so aga azo ti mo so.

⁶Ala yeke fâ wali-mua nga na wande, ala yeke fâ anyindu.

⁷Na pekoni ala tene: “KOTA GBIA abaa ni oko pepe, Nzapa ti Jacob ahinga tënë ni oko pepe!”

⁸Ala abuba zo so, mbeni zo ti buba ti lingbi na ala ayeke daa? Ala sara hange si! Ala, azo so li ti ala ayeke daa pepe so, ala yeke hinga ande ndo lawa?

⁹KOTA GBIA so aleke mê so, lo lingbi ti ma ndo pepe? Lo so lo sara le so, lo lingbi ti baa ndo pepe?

¹⁰Lo so lo fa nzoni lege na amara nde, lo lingbi ti pika ala pepe? Lo so lo mu hingango ndo na zo,

¹¹KOTA GBIA ahinga tënë ti be ti azo: tënë ti be ti zo ayeke senge senge ye.

¹²KOTA GBIA, ti lo nzoni, zo so mo fa nzoni lege na lo, zo so mo fa ye na lo na lege ti *Ndia ti mo!

¹³Na lango ti ye ti vundu, lo lingbi ti duti na siriri, ngbii asi na lango so a yeke zi du ndali ti azo ti sioni.

¹⁴Biani, KOTA GBIA ayeke ke azo ti lo pepe, azo so aga azo ti lo, lo yeke zia ala pepe.

¹⁵Fango ngbanga ayeke kiri ti ga mbirimbiri si azo ti vurungo be kue ayeke sara ye alingbi na ni.

¹⁶Zo wa laa ayeke gbu ande koko ti mbi ti kanga lege na azo ti sioni so, zo wa? Zo wa laa ayeke mu mbage ti mbi ti kanga lege na azo ti sarango sioni so, zo wa?

¹⁷Tongana KOTA GBIA amu fade maboko na mbi pepe, ka mbi hon hio na ndo so ndo ade daa ngii.

¹⁸Lakue tongana mbi tene: “Mbi yeke ti”, KOTA GBIA, nzoni be ti mo ayeke gbu mbi na nduzu.

¹⁹Tongana gba ti tënë ane be ti mbi, mo yeke de be ti mbi, mo yeke sara si tere ti mbi anzere.

²⁰Asioni zo so ayeke na li ti awafango-ngbanga si ayeke sara asioni ye so ndia ake tënë ni, fade mo yeke sara beoko na ala tongana nyen?

²¹Ala bongbi ti sara sioni na zo ti mbirimbiri, ala fâ ngbanga ti kuâ na li ti zo so tënë ayeke na li ti lo pepe.

²²Me KOTA GBIA ayeke ngangu gbagba ti bira na tere ti mbi; Nzapa ti mbi ayeke tongana kota têne so mbi kpe daa ti bata tere ti mbi.

²³Lo kiri na ala peko ti sioni ti ala, lo yeke fâ ala kue na lege ti sioni ti ala wani; KOTA GBIA, Nzapa ti e ayeke fâ ala kue.