Read sango Amato 11 Bible Online

Amato 11 - sango bible

Amato 11

¹Kilo so ayeke na legeni pepe, be ti KOTA GBIA ake ni mingi; me be ti lo anzere ndali ti kilo so ayeke na legeni.

²Tongana zo aga zo ti baba, aninga pepe lo ga zo ti kamene; me zo ti ndara ayeke zo so asara tere ti lo kete.

³Sarango ye na legeni ayeke fa lege na azo ti mbirimbiri; me sarango ye ti kirikiri ayeke buba fini ti azo ti handango ndo.

⁴Na lango ti fango ngbanga, mosoro ayeke sara ye oko ndali ti zo pepe; me sarango ye ti mbirimbiri laa ayeke zi zo na ya ti kuâ.

⁵Mbirimbiri ti zo so sarango ye ti lo ayeke na legeni ayeke sara si fini ti lo aduti mbirimbiri; me sarango sioni ti zo ti sioni asara si lo ti.

⁶Mbirimbiri ti azo ti mbirimbiri ayeke zi ala na ya ti kpale; me azo ti handango ndo ati na ya ti kuku ti aye so ala yeke sara nzara ni.

⁷So zo ti sioni akui, ye so lo zia be ti lo daa ti ku ahon; ziango be so lo zia na ndö ti mosoro ti lo ahon nga.

⁸A yeke zi zo ti mbirimbiri na ya ti ye ti ngangu; na plase ti lo, zo ti sioni ati na ya ni.

⁹Zo so ake Nzapa ayeke sara sioni na amba ti lo na lege ti atënë ti yanga ti lo; me azo ti mbirimbiri ayeke soo kuâ na lege ti hingango ye.

¹⁰Tongana ye ti azo ti mbirimbiri aga nzoni, azo ti gbata ni ayeke na ngia; tongana azo ti sioni akui, azo ti gbata ni ayeke dekongo na ngia.

¹¹Ndali ti anzoni sarango ye ti ala, azo ti mbirimbiri asara si aye ti nzoni aga na ya ti gbata ti ala. Me azo ti sioni ayeke buba gbata ni na lege ti atënë ti yanga ti ala.

¹²Zo so akasa mba ti lo, li ti lo ayeke daa pepe; me zo so ahinga ndo, lo kai ti lo kpoo.

¹³Zo so ayeke fono ti du mvene na li ti azo, lo yeke sigigi na atënë so ahonde. Me zo so mo lingbi ti zia be ti mo na ndö ti lo, lo yeke sigigi na tënë ni oko pepe.

¹⁴Tongana zo ti fango nzoni lege na azo ti kodro ayeke daa pepe, kodro ni ayeke gue ti ti. Ndali ti gba ti awamungo-wango si kodro ayeke sigigi na ya ti akpale.

¹⁵Zo so amu zendo ti futa yongo na peko ti mbeni wande, fade zo ni ayeke wara vundu daa. Ayeke fade nzoni titene zo ni amu zendo pepe si be ti lo aduti kpoo.

¹⁶Wali so ayeke na nzoni be, azo ayeke gonda lo. Koli so ayeke na ngangu, lo yeke wara mosoro.

¹⁷Zo so asara nzoni be na azo, lo sara nzoni na lo wani; me zo so asara ngangu na azo, lo sara sioni na lo wani.

¹⁸Futa so zo ti sioni awara ayeke senge ye; me zo so asara ye ti mbirimbiri, lo yeke wara nzoni ye na peko ni biani.

¹⁹Zo so aleke na be ti lo ti sara ye ti mbirimbiri, fade lo yeke ngba na fini; me zo so ayeke kpe na peko ti sarango sioni ye, lo yeke gue na le ti kuâ.

²⁰Be ti KOTA GBIA ake mingi azo so be ti ala asi singo na atënë ti mayere; me be ti lo anzere na azo so sarango ye ti ala ayeke na legeni.

²¹Taa-tënë, fade zo ti sioni ayeke wara ngbanga ti sioni ti lo; me azo ti mbirimbiri kue ayeke sigigi daa.

²²Wali so ayeke pendere si lo yeke zo ti buba, lo yeke tongana *kati ti lôro so a zia na hon ti nguru.

²³Nzara ti be ti azo ti mbirimbiri ayeke gi ye oko: sarango nzoni ye. Me ti azo ti sioni, ye so ala yeke ku ayeke gi ngonzo.

²⁴Ambeni zo ayeke mu ye mingi na amba ti ala si ala ga azo ti mosoro ahon ndoni. Me ambeni zo agbanzi ye gi ndali ti ala wani si ala ga awayere.

²⁵Zo so ayeke mu ye na azo na nzoni be, fade lo yeke wara anzoni ye gbani gbani na peko ni. Zo so amu ngu na azo ti nyon, a yeke mu nga na lo ngu ti nyon.

²⁶Zo so ayeke bongbi ale ti kobe ti bata ni batango, fade azo ti kodro ayeke deba lo. Me zo so ayeke ka ale ti kobe ni, azo ti kodro ayeke sara tufa na ndö ti lo.

²⁷Zo so ayeke gi lege ti sara nzoni, azo ayeke gonda lo; me zo so ayeke gi lege ti sara sioni, fade sioni ayeke si na lo.

²⁸Zo so azia be ti lo na ndö ti amosoro ti lo, fade lo yeke ti; me azo ti mbirimbiri ayeke mai tongana keke so akugbe ni angba fini ni.

²⁹Zo so aga na kpale na ya ti sewa ti lo, fade lo yeke wara ye oko pepe titene aga ti lo wani. Zo ti buba ayeke ga ngbaa ti zo ti ndara.

³⁰Sarango ye ti zo ti mbirimbiri ayeke tongana keke so ayeke mu fini na zo. Zo so ayeke na ndara, fade lo yeke woko be ti azo titene ala mu peko ti lo.

³¹Zo ti mbirimbiri awara futa ti lo na sese so awe; ayeke nzoni azo ahinga biani atene, fade zo ti sioni na zo ti siokpari ayeke wara nga ye so alingbi na ala!