Read sango Amato 12 Bible Online

Amato 12 - sango bible

Amato 12

¹Zo so aye titene a gboto mê ti lo, lo ye ti manda ye; zo so ake titene a suku na lo, lo yeke zo ti buba.

²Nzapa ayeke sara nzoni be na zo ti sarango nzoni; me lo yeke fâ ngbanga na li ti zo ti sarango ye na mayere.

³Zo ayeke luti ngangu ndali ti sioni sarango ye pepe; me azo ti mbirimbiri ayeke tongana keke so agunda ni ali sese nzoni.

⁴Wali so ane ayeke sara gonda ti koli ti lo; me wali so ayeke sara ye ti kamene, lo yeke tongana sioni kobela so ayeke te zo na ya ti bio.

⁵Tënë ti be ti azo ti mbirimbiri ayeke sarango ye na lege ti ndia; me ti azo ti sioni, ala ye gi handango azo.

⁶Atënë ti yanga ti azo ti sioni ayeke tongana kuku so ayeke fâ zo; me atënë ti azo ti mbirimbiri ayeke zi ala na kuâ.

⁷Tongana a kinda azo ti sioni na sese, ala yeke daa mbeni pepe; me sewa ti azo ti mbirimbiri ayeke ngba ti kpengba.

⁸Azo ayeke gonda zo ndali ti hingango ndo ti lo; me zo so be ti lo asi singo na aye ti kirikiri, azo ayeke baa lo tongana mbumbuse zo.

⁹Zo so asara tere ti lo kete, me lo yeke na zo ti kua oko, lo yeke nzoni lo hon zo so abaa tere ti lo tongana kota zo, me kobe atia lo.

¹⁰Zo ti mbirimbiri ahinga ye so lo lingbi ti mu na anyama ti lo; me azo ti sioni ayeke baa mawa ti ti ala pepe.

¹¹Zo so ayeke fâ yaka, fade lo yeke na gba ti kobe; me zo so ayeke tumba peko ti asenge senge ye, li ti lo ayeke daa pepe.

¹²Zo ti sioni asara nzara ti ye so asioni zo awara; me azo ti mbirimbiri ayeke tongana keke so agunda ni agbu sese si ale anzoni lengo ni.

¹³Atënë ti yanga ti zo ti sioni wani ayeke gbu lo tongana sioni kuku; me zo ti mbirimbiri ayeke sigigi ti lo yamba na ya ti ye ti ngangu.

¹⁴Atënë so zo atene alingbi ti sara si lo baa nzoni na pekoni legeoko tongana ti so zo ayeke wara futa na peko ti kua so lo sara.

¹⁵Sarango ye ti zo ti buba ayeke lakue nzoni na le ti lo wani; me zo so ayeke ma wango ayeke zo ti ndara.

¹⁶Zo ti buba ayeke sara si azo ahinga ngonzo ti lo hio; me zo ti hango le ayeke honde ngonzo ti be ti lo.

¹⁷Zo so ayeke tene taa-tënë, lo yeke zia lege na ye ti mbirimbiri; me zo so adu mvene na le ti ngbanga, lo yeke zia lege na tënë ti handa.

¹⁸Zo so ayeke diko atënë gbani gbani, atënë ni ayeke kpo zo tongana yongoro zeme; me atënë ti azo ti ndara ayeke tongana yoro ti kaingo na kobela.

¹⁹Taa-tënë ayeke ngba lakue; me tënë ti mvene ayeke ninga gi nzene-ngbonga.

²⁰Azo so aleke na be ti ala ti sara sioni, be ti ala asi singo na tënë ti handa; me azo so ayeke mu wango ndali ti siriri, ala yeke na ngia.

²¹Zo ti mbirimbiri, ye ti sioni ayeke si na lo pepe; me akpale gbani gbani ahon ndö ti azo ti sioni.

²²Be ti KOTA GBIA ake mingi azo ti mvene; me lo ye azo so ayeke sara ye na lege ti taa-tënë.

²³Zo ti hango le ayeke honde ye so lo hinga; me azo ti buba afa polele tënë ti buba ti ala.

²⁴Zo so maboko ti lo agbu kua ngangu, fade lo yeke sara komandema; me zo ti sopo ayeke ga ngbaa.

²⁵Gingo be asara si be ti zo awoko; me nzoni tënë asara si be ti lo asi singo na ngia.

²⁶Zo ti mbirimbiri ayeke fa nzoni lege na mba ti lo; me lege ti zo ti sioni asara si lo girisa lege.

²⁷Zo ti sopo ayeke wara nyama ti zongo ni pepe; me zo so agbu kua ngangu, so ayeke nzoni ye mingi ndali ti lo.

²⁸Fini ayeke na ndo so sarango ye ti mbirimbiri ayeke daa; zo so amu lege so, lo yeke kui pepe.